وزیرخارجہ شاہ محمود قریشی نے کہا ہے کہ ستاون مسلم ممالک کی آواز کی حامل او آئی سی، اقوام متحدہ کی قراردادوں کے مطابق مسئلہ کشمیر کے منصفانہ حل کیلئے موثر کردار ادا کرسکتی ہے۔
ملائشیا کے وزیرخارجہ سیف الدین عبداللہ نے وفد کے ہمراہ وزارتِ خارجہ اسلام آباد میں وزیر خارجہ مخدوم شاہ محمود قریشی سے ملاقات کی۔ دوران ملاقات دو طرفہ تعلقات ،علاقائی صورتحال سمیت باہمی دلچسپی کے امور پر تبادلہ خیال کیا گیا۔
شاہ محمود قریشی نے وزیرخارجہ ملائشیا کا منصب سنبھالنے پر سیف الدین عبداللہ کو مبارک باد دیتے ہوئے کہا کہ پاکستان، ملائشیا کے ساتھ اقتصادی، تجارتی، دفاعی، تعلیمی، سیاحتی اور سائنسی شعبہ جات میں دو طرفہ تعاون کے فروغ کیلئے پرعزم ہے۔
وزیرخارجہ نے کہا کہ اہم علاقائی و عالمی امور کے حوالے سے بین الاقوامی فورمز پر پاکستان اور ملایشیا کے مابین نقطہ نظر میں مماثلت خوش آئند ہے۔
وزیر خارجہ شاہ محمود قریشی نے ایف اے ٹی ایف کے معاملے پر پاکستان کے مؤقف کی مسلسل حمایت پر ملیشین ہم منصب کا شکریہ ادا کیا۔
وزیرخارجہ نے کرونا وبا کے دوران پاکستان واپسی کے منتظر دو ہزار پاکستانیوں کو وطن واپسی میں سہولت کی فراہمی پر ملیشین قیادت کا بھی شکریہ ادا کیا۔
وزیر خارجہ نے پاکستان اور ملائشیا کے درمیان عوام کی سطح پر روابط کے فروغ کیلئے سفری پابندیوں پرنظرثانی کی ضرورت پر زوردیا
شاہ محمود قریشی کا کہنا ہے کہ پاکستان، مارچ 2022 میں او آئی سی وزرائے خارجہ کونسل کے اڑتالیسویں اجلاس کی میزبانی کیلئے تیارہے۔ یکے بعد دیگرے دو وزرائے خارجہ کونسل کے اجلاسوں کی میزبانی، مسلم امہ کیلئے پاکستان کی سنجیدہ سوچ کی عکاسی کرتی ہے۔
انھوں نے کہا کہ پاکستان او آئی سی کو مسلم امہ کی مستحکم آواز گردانتے ہوئے اسلامو فوبیا، امن و سلامتی اور تنازعات کے حل کیلئے او آئی سی کے مؤثر کردار کا متقاضی ہے۔ چالیس سال کی جنگ و جدل کے بعد افغانستان میں قیام امن کی ایک امید دکھائی دی ہے۔
وزیرخارجہ نے مذید کہا کہ افغانستان میں ابھرتے ہوئے انسانی بحران کے لیے فوری اقدامات نہ کیے گئے تو اس کے مضمرات ہمسایہ ممالک، خطے اور دنیا بھر کو متاثر کرسکتے ہیں۔ ہم مسئلہ کشمیر کے حوالے سے او آئی سی کی مسلسل اور غیر متزلزل حمایت پر او آئی سی کے شکر گزار ہیں۔
ان کا کہنا تھا کہ ستاون مسلم ممالک کی آواز کی حامل او آئی سی، اقوام متحدہ کی قراردادوں کے مطابق مسئلہ کشمیر کے منصفانہ حل کیلئے موثر کردار ادا کرسکتی ہے۔
ملائشیا کے وزیرخارجہ سیف الدین عبداللہ نے پرتپاک خیرمقدم اور پرخلوص میزبانی پر وزیر خارجہ مخدوم شاہ محمود قریشی کا شکریہ ادا کیا۔
