کراچی: (ویب ڈیسک) ٹک ٹاکر حریم شاہ کی ایف آئی اے انکوائری کے خلاف درخواست سندھ ہائیکورٹ نے مسترد کر دی۔ عدالت نے قرار دیا کہ درخواست گزار پاکستان آنے کے بعد دوبارہ درخواست داٸر کرسکتی ہیں۔
معروف ٹک ٹاکرحریم شاہ کی بینک اکاونٹس اور سوشل میڈیا اکاونٹس منجمد کرنے اور منی لانڈرنگ کی انکواٸری کرنے کے خلاف درخواست کی سماعت شروع ہوٸی توعدالت نےسوال کیا کہ درخواست گذار کہاں ہیں، وہ عدالتی حکم کے باوجود پیش کیوں نہیں ہوئیں؟
حریم شاہ کے وکیل نے بتایا کہ حریم شاہ عمرے کی ادائیگی کیلئے سعودی عرب گئی ہیں، عدالت نے برہمی کا اظہار کرتے ہوئے قرار دیا کہ اگر درخواست گذارعدالتی حکم کو اتنا ہی غیر ضروری سمجھتی ہیں تو ہم ابھی درخواست نمٹا دیتے ہیں، حریم شاہ جب پاکستان واپس آئیں تو نئی درخواست دائر کرسکتی ہیں۔
حریم شاہ کے وکیل کا کہنا تھا کہ ایف آٸی اے نے بینک اکاونٹس اور سوشل میڈیا اکاونٹس منجمد کر دیئے اور یہ کارروائی ایف آئی اے نے حریم شاہ کی عدم موجودگی میں کی جبکہ اسسٹنٹ اٹارنی جنرل نےعدالت میں موقف اپنایا کہ ایف آئی اے نے متعدد نوٹس بھیجے لیکن حریم شاہ پیش نہیں ہوئیں ۔عدالت نے وکلا کے دلائل کے بعد حریم شاہ کی درخواست مسترد کر دی۔
