اسلام آباد: (ویب ڈیسک) وزیراعظم شہباز شریف کا کہنا ہےکہ نواب سراج الدولہ کے سپہ سالار کی بات کرکے عمران خان نے اداروں کو براہ راست نشانہ بنایا۔
قومی اسمبلی اجلاس سے خطاب کرتے ہوئے وزیراعظم شہباز شریف نے چیئرمین تحریک انصاف عمران خان کے ایبٹ آباد جلسے کے خطاب کا حوالہ دیتے ہوئےکہا کہ انہوں نے سراج الدولہ اور میرجعفر کا نام لے کرجو مثال دی اس سے بری حرکت نہیں ہوسکتی، عمران خان نے کہا سراج الدولہ کے سپہ سالار میر صادق اور میر جعفر غدار نکلے، عمران نیازی نے ادارے کے بارے میں جو زہر اگلا وہ پاکستان کے خلاف سازش ہے۔
وزیراعظم شہباز شریف کا کہنا تھا کہ قوم تقسیم درتقسیم ہوچکی ہے، زہر گھول دیا گیا ہے، عمران خان نے جو کل بات کی وہ انتہائی خطرناک ہے، نواب سراج الدولہ کے سپہ سالار کی بات کرکے عمران خان نے اداروں کو براہ راست نشانہ بنایا، پاکستان کو امریکی دھمکی کی تاریخ تو بہت پرانی ہے اس میں سازش کا عنصرکہاں سے نکلا۔
شہباز شریف کا کہنا تھا کہ اگر انہیں آئین و قانون کے ذریعے نہ روکا گیا تو خدانخواستہ یہ ملک لیبیا اور شام کی تصویر بن جائےگا، آپ تو لاڈلے تھے آپ کو تو بچےکی طرح اس ادارے نے دودھ پلایا، 75 سال میں کسی منتخب حکومت کو اس طرح سپورٹ نہیں کیا گیا جس طرح عمران نیازی کو کیا گیا لیکن اس کے باجود اس نے نہ کچھ سیکھا اور نہ کوئی کارکردگی دکھائی، اس ادارے نے جو سپورٹ عمران خان کو کی اس کی 20 یا 30 فیصد بھی ہمیں ملتی تو اس ملک کو آگے لے جاتے۔
ان کا کہنا تھا کہ کل جو عمران خان نے زبان استعمال کی ہے، اگر اس کو آئین و قانون کے دائرے میں رہ کر سختی سے نہ روکا گیا تو اس ملک میں بھونچال آسکتا ہے، یہ جمہوریت کو ختم کرنا چاہتے ہیں، اس بات کا بھرپور نوٹس لیا جائے، اس معاملے کو کنٹرول کرنا ہوگا ورنہ خدانخواستہ کچھ نہیں بچےگا۔
بجلی کی لوڈ شیڈنگ پر اظہار خیال کرتے ہوئے شہباز شریف کا کہنا تھا کہ ماضی کی حکومت نے تیل اور گیس وقت پر نہیں منگوایا، عید کے بعد لوڈ شیڈنگ میں کمی ہوئی ہے،دور دروز علاقوں میں لوڈ شیڈنگ کی تحقیقات کریں گے۔
وزیراعظم کا کہنا تھا کہ گیس کا انتظام کررہے ہیں،گیس کے جہاز خرید رہے ہیں، ماضی کی حکومت نے تیل اور گیس وقت پر نہیں منگوایا۔
عمران نیازی نے سراج الدولہ اور میر جعفرکی مثال دیکراداروں کو نشانہ بنایا، وزیراعظم
