شیشے کی بوتل پر چیزیں متوازن کرنے والا حیرت انگیز ماہر

بیجنگ (ویب ڈیسک) چینی ماہر وینگ ییکن بظاہر بے جوڑ اشیاء کو ایک دوسرے پر رکھ کر متوازن کرنے کی عالمی شہرت رکھتے ہیں، وہ شیشے کی بوتل پر سلائی مشین دھرتے ہیں تو کبھی گرے بغیر کرسی کی دو ٹانگوں پرتوازن رکھتے ہیں۔
بظاہر یوں لگتا ہے کہ کئی مواقع پر انہوں نے زمینی ثقل کو بے اثر کردیا ہے لیکن ایسا نہیں کیونکہ وہ خاص مقامات پر اشیاء کو رکھتے ہیں اور اس میں بے حد صبر اور محنت کی ضرورت ہوتی ہے۔
وینگ پیشے کے لحاظ سے الیکٹریشن ہیں اور انہوں نے سافٹ ڈرنک بوتل پر سلائی مشین کھڑی کر کے دنیا کو حیران کر دیا ہے، اس کے علاوہ باریک سلاخوں پر گیس کے بڑے سلنڈر بھی موازن کرچکے ہیں، تاہم لوگوں نے ان کی مہارت کا اعتراف کیا ہے اور اپنی حیرانی بھی بیان کی ہے۔
2017میں انہوں نے بطورِ مشغلہ یہ فن اپنایا اور اپنی تصاویر سوشل میڈیا پر پوسٹ کیں، اب یہ حال ہے کہ ان کے مداحوں کی تعداد بڑھتی ہی جا رہی ہے اور ٹک ٹاک پر فالوورز دسیوں لاکھوں تک پہنچ چکی ہے۔ لیکن وہ اس شوق کی خاطر درجنوں بوتلیں اور سامان توڑچکے ہیں، بعض اوقات پورا نظام آخری مرحلے میں دھڑام سے نیچے آ گرتا ہے لیکن وینگ ہار نہیں مانتے اور اپنی کوشش جاری رکھتے ہوئے گھنٹوں اپنے کام میں مگن رہتے ہیں یہی وجہ ہے کہ لوگ ان کے بہت معترف ہیں۔
وینگ نے کہا کہ اگر کوئی اس کام کو سیکھنا چاہتا ہے تو پہلے چائے کا کپ متوازن کرنے سے اپنی مشق کا آغاز کرے۔