حدیقہ کیانی بلوچستان میں سیلاب سے تباہ تین گاؤں دوبارہ تعمیر کرائیں گی

کوئٹہ: (ویب ڈیسک) معروف گلوکارہ و اداکارہ حدیقہ کیانی نے سیلاب سے متاثر صوبہ بلوچستان کےتین گاؤں کی دوبارہ تعمیر کے عزم کا اعادہ کرتے ہوئے کہا ہے کہ وہ صوبہ سندھ اور پنجاب میں بھی فلاحی کام جاری رکھیں گی۔
واضح رہے کہ حدیقہ نے سیلاب کے فوری بعد امدادی کاموں کا آغاز کردیا تھا اور انہوں نے ‘وسلیہ راہ’ نامی امدادی مہم بھی شروع کی تھی۔
بلوچستان میں سیلاب سے متاثرہ خواتین سے ملاقات کی ایک مختصر ویڈیو ٹوئٹر پر شیئر کرتے ہوئے بتایا کہ انہوں نے سیلاب سے تباہ ہونے والے چند گاؤں کی دوبارہ تعمیر کی ذمہ داری اٹھائی ہے۔
حدیقہ کیانی نے بتایا کہ انہوں نے بلوچستان کے ‘ربی، چھتر اور اب ٹمبو’ نامی گائوں کو دوبارہ تعمیر کروانے کی ذمہ داری اٹھائی ہے۔
مذکورہ مہم کے دوران حدیقہ کیانی نے ابتدائی طور پر صوبہ بلوچستان کے سیلاب متاثرہ افراد کی امداد کی اور انہیں خوراک کے علاوہ ضروری اشیا فراہم کرنے سمیت انہیں ٹینٹ بھی فراہم کیے تھے۔
گلوکارہ و اداکارہ کی جانب سے بلوچستان بھجوائے گئے امدادی سامان کے بعد حال ہی میں انہوں نے خود بھی وہاں کا دورہ کیا اور وہ وہاں خواتین سے بھی ملی ہیں۔