نئی دہلی: (ویب ڈیسک) بھارت میں مرغی نے ایک دن میں 31 انڈے دے کر سب کو حیرت میں مبتلا کر دیا۔
بھارتی میڈیا رپورٹس کے مطابق ان دنوں ریاست اتراکھنڈ کے ضلع الموڑا میں ایک مرغی سب کی توجہ کا مرکز بنی ہوئی ہے کیونکہ اس نے ایک دن میں دو، تین نہیں بلکہ پورے 31 انڈے دینے کے بعد سب کو حیران کر دیا۔
رپورٹس کے مطابق یہ مرغی عام مرغیوں کی طرح کیڑے مکوڑے نہیں بلکہ مونگ پھلی اور لہسن کھاتی ہے۔
میڈیا رپورٹس میں بتایا گیا ہے کہ مرغی کے مالک گریش چندرا بدھانی کے بچے مرغیاں پالنا چاہتے تھے تو وہ دور دراز علاقے سے دو چوزے دو سو روپے میں خرید کر لائے، گریش چندر اور ان کے بچوں نے چوزوں کو پالنا شروع کیا ،وہ مرغیوں کو لہسن اور مونگ پھلی کھلاتے تھے۔
25 دسمبر کو جب گریش گھر واپس آئے تو ان کے بچوں نے بتایا کہ ایک مرغی نے 5 انڈے دیئے ہیں، وہ یہ سن کر حیران ہوئے تاہم یہ سلسلہ رُکا نہیں، اس کے بعد مرغی نے ہر 10، 15 منٹ میں انڈے دینا شروع کئے اور مجموعی طور پر 31 انڈے دیئے۔
اتنی تعداد میں انڈے دینے کے بعد گریش کو لگا کہ مرغی کسی قسم کی بیماری میں مبتلا ہے اس لئے وہ اسے ڈاکٹر کے پاس لے گئے۔
رپورٹس کے مطابق ڈاکٹر نے مرغی کا چیک اپ کرنے کے بعد بتایا کہ مرغی بالکل ٹھیک اور صحت مند ہے۔
علاقہ مکین گریش کی مرغی کو دیکھنے کے لئے جمع ہوگئے، ان کا مشورہ ہے کہ گریش کو اپنی مرغی کا نام گنیز بک آف ورلڈ ریکارڈز میں درج کروانا چاہیے۔
ایک دن میں 31 انڈے دینے والی مرغی توجہ کا مرکز بن گئی
