جعلی معلومات کا الزام ، روس نے وکی پیڈیا پر بھاری جرمانہ عائد کردیا

ماسکو : (ویب ڈیسک) روس نے جعلی معلومات کے الزام پر وکی پیڈیا پر 27 ہزارڈالر جرمانہ عائد کردیا۔
خبررساں ادارے کے مطابق روسی عدالت نے اپنے فیصلے میں کہا کہ وکی پیڈیا یوکرین میں روس آپریشن کے بارے میں جعلی معلومات ہٹانے میں ناکام رہا ہے ، لہذا وکی پیڈیا کو جعلی معلومات ویب سائٹ سے نہ ہٹانے کے الزام میں 27 ہزار ڈالر ادا کرنے ہوں گے۔
روس کی جانب سے یوکرین پر حملے کے بعد بنائےگئے قوانین کے بعد روس، یوکرین تنازع پر روس کے موقف کے خلاف رپورٹنگ کرنے والے افراد اور اداروں پر جرمانے اور پابندیاں عائد کی گئی ہیں۔
وکی پیڈیا کی مالک کمپنی وکی میڈیا کو اس سے قبل بھی جنگ سے متعلق دو آرٹیکل نہ ہٹانے پر جرمانہ کیا گیا تھا جبکہ حالیہ جرمانہ روسی ملٹری یونٹس کے حوالے سے غلط معلومات نہ ہٹانے کے الزام میں عائد کیا گیا ہے۔
کمپنی کا اس حوالے سے کہنا ہے کہ فیصلے کے خلاف اپیل کا فیصلہ تاحال نہیں کیا گیا ہے ۔