ماسکو: (ویب ڈیسک) روس کے نیم فوجی دستے ویگنر گروپ نے یوکرینی شہر بخموت پر قبضے کا دعویٰ کیا ہے۔
سربراہ ویگنر گروپ یوگینی پریگوژن نے کہا کہ آج 20 مئی کو بخموت شہر پر مکمل قبضہ کر لیا گیا ہے ، ٹیلی گرام پر جاری کردہ ایک ویڈیومیں یہ دعویٰ کیا گیا ہے جس میں وہ روسی جھنڈے اور ویگنر کے بینراٹھائے جنگجوؤں کی ایک قطارکے سامنے جنگی وردی میں نظر آئے ہیں۔
انہوں نے کہا کہ بخموت کا کنٹرول جلد روسی افواج کے حوالے کر دیں گے، ویگنر گروپ کے دستے 25 مئی سے بخموت سے واپسی شروع کر دیں گے۔
بین الاقوامی میڈیا رپورٹس کے مطابق بخموت میں جاری جنگ کے دوران روس اور یوکرین دونوں کو بھاری نقصان اٹھانا پڑا ہے، اگر ویگنر کا دعویٰ درست نکلتا ہے تو یہ روس کی یوکرین جنگ میں اب تک کی سب سے اہم فتح ہوگی۔
خبر ایجنسی کے مطابق یوکرین نے روس کے ویگنر گروپ کا دعویٰ مسترد کر دیا۔
دوسری جانب ویگنر کی طرف سے یہ دعویٰ اس وقت سامنے آیا ہے جب یوکرین کے صدر ولادیمیر زیلنسکی نے جاپان میں جی 7 سربراہی اجلاس میں شرکت کی۔
