اسلام آباد: (ویب ڈیسک) وزیراعظم کی زیر صدارت قومی اقتصادی کونسل کا اہم اجلاس آج ہو گا۔
وزیراعظم کی زیرصدارت ہونے والے قومی اقتصادی کونسل کے اجلاس میں نئے مالی سال کے ترقیاتی منصوبوں کا جائزہ لیا جائے گا، اجلاس میں وفاقی وزراء اور صوبائی وزرائے اعلیٰ شریک ہوں گے۔
ذرائع کے مطابق نئے مالی سال کیلئے ترقیاتی بجٹ 2659 ارب روپے تجویز کیا گیا ہے، اجلاس میں وزرائے اعلیٰ اور حکام اپنے اپنے ترقیاتی بجٹ پربریفنگ دیں گے۔
وزیر اعلیٰ بلوچستان کا اجلاس میں شرکت نہ کرنے کا اعلان
دوسری جانب وزیر اعلیٰ بلوچستان میرعبدالقدوس بزنجو نے آج قومی اقتصادی کونسل کے اجلاس میں شرکت نہ کرنے کا اعلان کیا ہے۔
وزیر اعلیٰ بلوچستان میرعبدالقدوس بزنجو نے کہا ہے کہ مجھ سمیت صوبے کا کوئی ممبر اسلام آباد میں ہونے والے این ای سی کے اجلاس میں شرکت نہیں کرے گا۔
وزیر اعلیٰ بلوچستان نے اپنے بیان میں کہا ہے کہ این ای سی اجلاس میں شرکت نہ کرنے کا حتمی فیصلہ وفاقی حکومت کے عدم تعاون کے رویہ کو دیکھتے ہوئے کیا ہے، وفاق نے بلوچستان کے حوالے سے جو بھی یقین دہانیاں اور وعدے اب تک کیے ان پر عملدرآمد نہیں ہوا، یہ رویہ انتہائی مایوس کن صورتحال کی نشاندہی کرتا ہے، سیلاب متاثرین کی بحالی کیلئے اعلان کردہ دس ارب روپے بھی فراہم نہیں کیے گئے۔
وزیراعظم کی زیر صدارت قومی اقتصادی کونسل کا اہم اجلاس آج ہو گا
