ممبئی: بالی ووڈ کے نواب اسٹار سیف علی خان نے انکشاف کیا ہے کہ اگر وہ بروقت اپنے ہاتھ کی سرجری نہیں کرواتے تو ایک ہاتھ سے معذور ہوسکتے تھے۔
بھارتی میڈیا کے مطابق حال ہی میں سیف علی خان نے ممبئی کے کوکیلابین اسپتال میں اپنے ہاتھ کی سرجری کروائی جس کے بعد وہ اسپتال سے ڈسچارج بھی ہوگئے ہیں۔
سرجری کے بعد بھارتی میڈیا سے گفتگو کرتے ہوئے سیف علی خان نے کہا کہ میرے ہاتھ میں کافی عرصے سے تکلیف تھی لیکن مجھے یہ نہیں معلوم تھا کہ چوٹ اتنی گہری ہے کہ سرجری کی ضرورت پڑ جائے گی۔
سیف علی خان نے کہا کہ میں فلم ‘دیوارا’ کے لیے ایکشن سین کرتے ہوئے دوبارہ زخمی ہوگیا تھا جس کے بعد ہاتھ کی تکلیف میں مزید اضافہ ہوگیا تھا، پھر ڈاکٹر کے مشورے پر ایم آر آئی کروائی تو معلوم ہوا کہ ٹرائی سیپ ٹینڈن بری طرح سے پھٹ چکا ہے۔
اداکار نے کہا کہ ڈاکٹر نے فوری سرجری کروانے کا مشورہ دیا، اگر میری سرجری بروقت نہ ہوتی تو میں ایک ہاتھ سے معذور ہوسکتا تھا۔
انہوں نے مزید کہا کہ میں اسپتال سے ڈسچارج تو ہوگیا ہوں لیکن مکمل صحتیابی کے لیے ایک ماہ آرام کرنا ہوگا۔
