پاکستان کرکٹ بورڈ (پی سی بی) نے انگلینڈ کیخلاف آئندہ 3 ٹیسٹ میچز کی سیریز کیلئے براڈکاسٹرز کیساتھ شراکت پر امید کا اظہار کردیا۔
میڈیا رپورٹس کے مطابق پاکستان کرکٹ بورڈ کی جانب سے گزشتہ ماہ جاری کیے گئے ٹینڈر دستاویز پر کسی انگلش ٹی وی چینل نے کوئی دلچسپی نہیں دیکھائی جس سے سیریز کے برطانیہ میں بلیک آؤٹ کا خدشہ پیدا ہوگیا ہے۔
روایتی طور پر اسکائی اسپورٹس 2022 میں پاکستان بمقابلہ انگلینڈ سیریز سمیت تقریباً 30 سالوں سے انگلینڈ کے بیرون ملک ٹیسٹ میچز نشر کررہا ہے تاہم اس بار اس چینل نے حیران کن طور پر بولی میں حصہ نہیں لیا۔
اسکائی اسپورٹس نے پی سی بی کو واضح اشارہ دیا ہے کہ وہ بولی لگانے کا ارادہ نہیں رکھتا جبکہ ٹی این ٹی اسپورٹس نے مذاکرات میں شامل ہونے سے انکار کردیا ہے۔
بورڈ ذرائع کا کہنا ہے کہ نئے براڈ کاسٹرز کی تلاش کیلئے کوششیں کی جارہی ہیں تاکہ برطانیہ میں کرکٹ شائقین ٹیم کے میچز سے محروم نہ رہ سکیں۔
دوسری جانب دونوں ٹیموں کے درمیان سیریز شروع ہونے میں محض 7 ہفتے رہ گئے ہیں۔
واضح رہے کہ پاکستان کرکٹ ٹیم کے مصروف ترین سیزن کا آغاز ہوگیا ہے، قومی ٹیم بنگلادیش کے خلاف ہوم سیریز میں 2 ٹیسٹ، انگلینڈ کے خلاف سیریز اکتوبر میں شروع ہونے والی سیریز میں 3 ٹیسٹ جبکہ آسٹریلیا، زمبابوے اور جنوبی افریقہ کیلئے قومی ٹیم نومبر دسمبر میں دورہ کرے گی۔
