مالی سال 2024 میں امریکی اسلحے کی برآمدات 318ارب ڈالر سے زائد مالیت کے ساتھ تاریخ کی بلند ترین سطح پر پہنچ گئیں۔
امریکی محکمہ خارجہ کی حالیہ رپورٹ کے مطابق مالی سال 2024 میں امریکی اسلحہ کی برآمدات میں ریکارڈ اضافہ ہوا ہے جس سے مجموعی فروخت 318.7 بلین ڈالر تک پہنچ گئی ہے جو گزشتہ سال کی نسب 29 فیصد زیادہ ہے۔
رائٹرز کے مطابق اسلحہ کی فروخت دو اہم طریقوں سے ہوتی ہے جس میں پہلا طریقہ براہِ راست تجارتی فروخت ہے جس میں غیر ملکی حکومتیں امریکی کمپنیوں سے براہِ راست معاہدے کرتی ہیں جبکہ اسلحہ کی فروخت کا دوسرا طریقہ غیر ملکی فوجی فروخت ہے جس میں حکومتیں امریکی محکمہ دفاع کے ذریعے اسلحہ حاصل کرتی ہیں، دونوں صورتوں میں امریکی حکومت کی منظوری ضروری ہوتی ہے۔
انٹرنیشنل میڈیا رپورٹس کے مطابق مالی سال 2024 میں براہِ راست تجارتی فروخت 157.5 بلین ڈالر سے بڑھ کر 200.8 بلین ڈالر تک پہنچ گئی، جبکہ غیر ملکی فوجی فروخت 80.9 بلین ڈالر سے بڑھ کر 117.9 بلین ڈالر ہو گئی۔
امریکی محکمہ خارجہ کے مطابق اسلحہ کی فروخت اور منتقلی امریکی خارجہ پالیسی کے اہم اوزار ہیں جو علاقائی اور عالمی سلامتی پر طویل مدتی اثرات مرتب کر سکتے ہیں۔
