ٹرمپ کا بڑا اعلان، ریپبلکن کامیاب ہوئے تو ہر بالغ امریکی کو 5 ہزار ڈالر
امریکی صدر ڈونلڈ ٹرمپ نے ریپبلکن پارٹی کی وسط مدتی انتخابی مہم کے دوران اعلان کیا ہے کہ اگر نومبر کے انتخابات میں ریپبلکن پارٹی ایوانِ نمائندگان اور سینیٹ دونوں میں اپنا کنٹرول برقرار رکھنے میں کامیاب ہوتی ہے تو ہر بالغ امریکی شہری کو 5 ہزار ڈالر کا خصوصی ’’ٹرمپ ڈویڈنڈ‘‘ دیا جائے گا۔
ٹرمپ نے یہ اعلان ڈلاس میں ریپبلکن پارٹی کے کنونشن سے خطاب کرتے ہوئے کیا۔ ان کا کہنا تھا کہ ملک کی معاشی کامیابی اور مضبوط اقتصادی کارکردگی کی بنیاد پر وہ ہر بالغ شہری کو یہ رقم دینے کا ارادہ رکھتے ہیں۔ تاہم انہوں نے واضح کیا کہ اس رقم کو امریکا کے اندر ہی خرچ کرنا ہوگا۔
ٹرمپ نے اس ادائیگی کو ایک کامیاب کمپنی کی جانب سے اپنے شیئر ہولڈرز میں نقد رقم تقسیم کرنے سے تشبیہ دی اور اسے ’’Trump Dividend‘‘ قرار دیا۔ تاہم صدر نے ابھی تک یہ نہیں بتایا کہ 5 ہزار ڈالر کی ادائیگی کے لیے رقم کہاں سے آئے گی، طریقہ کار کیا ہوگا یا اسے کانگریس سے منظوری کی ضرورت ہوگی یا نہیں۔
رپورٹس کے مطابق تمام بالغ امریکی شہریوں کو یہ رقم دینے کی صورت میں منصوبے کی لاگت ایک ٹریلین ڈالر سے زیادہ ہوسکتی ہے، جس کے باعث اس کی مالی اور قانونی حیثیت پر بھی سوالات اٹھ رہے ہیں۔
یہ اعلان ایسے وقت میں سامنے آیا ہے جب نومبر 2026 کے وسط مدتی انتخابات میں ریپبلکنز کو کانگریس پر اپنا کنٹرول برقرار رکھنے کے لیے سخت مقابلے کا سامنا ہے۔
