گوگل نے اپنے مقبول ترین آرٹی فیشل انٹیلی جنس (اے آئی) امیج ایڈیٹر نانو بنانا کا اپ گریڈ ورژن متعارف کرا دیا ہے۔
گوگل کی جانب سے نانو بنانا 2 کو متعارف کرایا گیا ہے جو اس وائرل اے آئی امیج ایڈیٹنگ ٹول کا سیکنڈ جنریشن ورژن ہے۔
جیسا آپ کو علم ہوگا کہ نانو بنانا کو گوگل نے 2025 کی دوسری ششماہی کے دوران متعارف کرایا تھا اور یہ بہت تیزی سے مقبول ہوا تھا۔
اس کی وجہ یہ ہے کہ اس میں تصاویر کو تیار کرانا یا اپنی تصاویر کو ایڈٹ کرانا بہت آسان ہے۔
نانو بنانا کا پرو ورژن چند ماہ پہلے پیش کیا گیا اور وہ تحریری ہدایات پر بہت زیادہ بہتر تصاویر تیار کرنے کی صلاحیت رکھتا ہے۔
اب گوگل کی جانب سے کہا گیا ہے کہ نانو بنانا 2 لوگوں کو دنگ کر دے گا۔
نانو بنانا 2 گوگل کے بنیادی اے آئی امیج ماڈل کا زیادہ بہتر ورژن ہے۔
کمپنی نے بتایا کہ اس نئے ماڈل کی رفتار اوریجنل ماڈل کے مقابلے میں زیادہ ہوگی جبکہ اس کی تیار کردہ تصاویر زیادہ حقیقی محسوس ہوں گی۔
تصاویر کے اندر اگر آپ ٹیکسٹ یا تحریر کو شامل کرنا چاہیں گے جیسے کسی تقریب کا کارڈ تیار کرنا چاہتے ہیں، تو وہ ٹیکسٹ بھی زیادہ واضح ہوگا اور حروف کا تسلسل برقرار رہے گا۔
گوگل کے مطابق نیا نانو بنانا ماڈل تصاویر کے اندر ٹیکسٹ کو درست رکھنے کی صلاحیت رکھتا ہے اور 4k ریزولوشن تصاویر تیار کرسکتا ہے۔
نیا نانو بنانا 2 ماڈل جیمنائی استعمال کرنے والے تمام صارفین کو دستیاب ہے اور اوریجنل ماڈل کی جگہ لے گا۔
