وزیراعظم شہبازشریف کا کہنا ہے کہ تیل کی قیمتوں میں اضافے کی تجاویز کو بارہا مسترد کیا، کمزور اور متوسط طبقے کو مزید ریلیف فراہم کرنے کیلئے کوشاں ہیں۔
خلیجی بحران کے پیٹرولیم مصنوعات پر اثرات کے پیش نظر موجودہ ذخائر اور عوامی ریلیف کے اقدامات ہر جائزہ اجلاس میں وزیراعظم شہبازشریف نے کہا کہ مشکل میں معاشی طور پر کمزور طبقے کو اکیلا نہیں چھوڑیں گے، بچت اقدمات سے حاصل رقم عوامی ریلیف کیلئے بروئے کار لائی گئی، ڈیجیٹل نظام استعمال کرکے عوامی ریلیف کے اقدامات عام آدمی تک پہنچائیں گے۔
شہبازشریف کا کہنا تھا کہ سرکاری اخراجات میں کمی اور ترقیاتی بجٹ میں کٹوتی کی،60 فیصد سرکاری گاڑیوں کو فوری طور پر بند کرنے کا حکم دیا۔ موجودہ حالات میں قربانی کا سلسلہ حکومتی اخراجات میں کٹوتی کرکے شروع کیا، عالمی بحران کے باوجود بروقت فیصلوں سے ایندھن کی فراہمی میں تعطل نہیں آنے دیا۔ پاکستان خطے میں امن کے حوالے سے سفارتی محاذ پر بھرپور کوششیں کررہا ہے۔
اجلاس کو ایندھن بچت کیلئے حکومتی اقدامات، آئندہ کی تجاویز اورموجودہ اسٹاک پر تفصیلی بریفنگ دی گئی، شرکاء کو بتایا گیا کہ موٹرسائیکل اور رکشے رکھنے والوں کی رجسٹریشن جلد مکمل کی جائے گی، صوبائی حکومتوں کے ساتھ مل کر ممکنہ ریلیف کیلئے روابط مربوط کئے جارہے ہیں۔
اجلاس میں وزیراعظم کے بچت اقدامات پر عملدرآمد اور سادگی مہم پر انٹیلی جینس بیورو کی آڈٹ رپورٹ بھی پیش کردی گئی، رپورٹ کے مطابق وزیراعظم کی بچت اور سادگی مہم پر عملدرآمد یقینی بنایا جارہا ہے۔ ملکی ضرورت کیلئے ایندھن کے مناسب ذخائر موجود، آئندہ کیلئے بھی انتظامات کئے جارہے ہیں۔
