آئی پی ایل کے فائنل کی میزبانی اچانک بینگلور کے بجائے احمد آباد کو دے دی گئی ہے۔
بھارتی کرکٹ بورڈ نے اعلان کیا کہ مقامی ایسوسی ایشن اور حکام کی جانب سے کچھ ایسی ضروریات سامنے آئیں جو بورڈ کے طے شدہ اصولوں اور پروٹوکول سے مطابقت نہیں رکھتی تھیں، اس لیے فائنل کا مقام تبدیل کرنے کا فیصلہ کیا گیا۔
اب 31 مئی کو فائنل احمد آباد کے نریندر مودی اسٹیڈیم میں کھیلا جائے گا۔
اس کے علاوہ کوالیفائر ون 26 مئی کو دھرمشالہ میں ہوگا جبکہ ایلیمنیٹر اور کوالیفائر ٹو 27 اور 29 مئی کو نیو چندی گڑھ میں شیڈول ہیں۔
کرناٹک اسٹیٹ کرکٹ ایسوسی ایشن نے اپنے بیان میں کہا کہ وہ پلے آف میچز کی میزبانی کے لیے مکمل طور پر تیار تھے تاہم بی سی سی آئی نے دیگر مقامات کا انتخاب کیا۔
ایسوسی ایشن کے مطابق فیصلے کی وجوہات باضابطہ طور پر نہیں بتائی گئیں لیکن وہ بورڈ کے اختیار کا احترام کرتے ہیں۔
نئے شیڈول کے تحت کوالیفائر ٹو جیتنے والی ٹیم کو بھی فائنل کے لیے سفر کرنا پڑے گا جس سے کوالیفائر ون کی فاتح ٹیم کو نسبتاً زیادہ فائدہ مل سکتا ہے۔
دفاعی چیمپئن رائل چیلنجرز بینگلور اگر فائنل میں پہنچتی ہے تو اسے ہوم گراؤنڈ کا فائدہ بھی حاصل نہیں ہوگا۔
