بنگلا دیش کے خلاف پہلے ٹیسٹ کی پہلی اننگز میں کھیل کے تیسرے روز کے آغاز پر پاکستان ٹیم کی ڈگمگاتی بیٹنگ سنبھل گئی، ڈیبیو کرنے والے اوپنر اذان اویس سنچری بنانے میں کامیاب رہے۔
تیسرے روز پاکستان نے 179 رنز ایک وکٹ کے نقصان پر اننگز کا آغاز کیا لیکن 210 کے مجموعی اسکور پر اوپنر اذان اویس 103 رنز بنا کر آؤٹ ہوگئے۔
اوپنر کی وکٹ گرتے ہی قومی ٹیم کی بیٹنگ لائن لڑ کھڑا گئی۔ تیسری وکٹ کپتان شان مسعود کی 226 رنز، چوتھی وکٹ سعود شکیل کی 227 رنز اور پانچویں وکٹ عبداللہ فضل کی 230 رنز پر گری۔ عبداللہ فضل 60 رنز، شان مسعود 9 رنز اور سعود شکل صفر پر آؤٹ ہوئے۔
میزبان ٹیم کے خلاف 227 رنز پر 5 کھلاڑی آؤٹ ہونے کے بعد سلمان علی آغا اور محمد رضوان نے ٹیم کا سہارا دیا۔ دونوں کھلاڑیوں کے درمیان چھٹی وکٹ کی شراکت میں اب تک 100 سے زائد رنز بنائے گئے ہیں۔
ڈھاکا میں کھیلے جانے والے میچ کے دوسرے روز پاکستان نے محتاط انداز میں اپنی پہلی اننگز کا آغاز کیا۔ پاکستان کی جانب سے گرنے والی واحد وکٹ امام الحق کی تھی جو 45 رنز بنا کر آؤٹ ہوئے، بنگلادیش کے اسپنر مہدی حسن مرزا نے انکی وکٹ حاصل کی۔
اس سے قبل، بنگلادیش کی پوری ٹیم پہلی اننگز میں 413 رنز بنا کر آؤٹ ہوگئی۔ دوسرے دن کھیل کا آغاز مشفق الرحیم نے 48 اور لٹن داس نے 8 رنز سے کیا۔ بنگلادیش کے کپتان نجم الحسن شانتو نے شاندار بیٹنگ کرتے ہوئے سنچری اسکور کی اور 101 رنز بنائے، جبکہ مومن الحق 91 رنز کے ساتھ نمایاں رہے۔ دیگر بلے بازوں میں مشفق الرحیم 71، لٹن داس 33، مہدی حسن مرزا 10 اور تیج الاسلام 17 رنز بنا سکے۔
پاکستان کی جانب سے فاسٹ بولر محمد عباس نے تباہ کن بولنگ کا مظاہرہ کرتے ہوئے 5 کھلاڑیوں کو پویلین کی راہ دکھائی، جبکہ شاہین آفریدی نے 3 وکٹیں حاصل کیں۔
بنگلادیش کی اننگز کے خاتمے کے بعد میچ دلچسپ مرحلے میں داخل ہو چکا ہے اور تیسرے روز پاکستان کی کوشش ہوگی کہ وہ پہلے میزبان ٹیم کا اسکور برابر کرے اور پھر برتری حاصل کرے۔
واضح رہے کہ پہلے روز کے اختتام پر بنگلادیش نے 4 وکٹوں کے نقصان پر 301 رنز بنائے تھے۔
