امریکا کی ریاست واشنگٹن کے شہر سیئٹل میں واقع مشہور اسپیس نیڈل کے قریب منعقد ہونے والے سالانہ "بائٹ آف سیئٹل” فوڈ فیسٹیول کے دوران فائرنگ کے واقعے میں ابتدائی طور پر 2 افراد ہلاک اور 5 زخمی ہوئے، جن میں ایک 2 سالہ بچہ بھی شامل ہے۔
پولیس کے مطابق فائرنگ اتوار کی شام اس وقت ہوئی جب ہزاروں افراد فیسٹیول میں موجود تھے۔ اچانک گولیاں چلنے سے موقع پر بھگدڑ مچ گئی اور لوگ جان بچانے کے لیے ادھر اُدھر بھاگنے لگے۔ عینی شاہدین نے بتایا کہ متعدد فائرنگ کی آوازیں سنائی دیں، جس کے بعد پولیس اور امدادی ٹیمیں فوری طور پر جائے وقوعہ پر پہنچ گئیں۔
حکام کا کہنا ہے کہ ابتدائی تحقیقات کے مطابق دو افراد کے درمیان فائرنگ کا تبادلہ ہوا، جس کی زد میں کئی بے گناہ شہری آ گئے۔ پولیس نے ایک مشتبہ شخص کو گرفتار کر لیا ہے جبکہ دوسرے مشتبہ شخص کی تلاش جاری ہے۔ جائے وقوعہ سے دو آتشیں اسلحے بھی برآمد کیے گئے ہیں۔
بعد ازاں اسپتال میں ایک اور زخمی دم توڑ گیا، جس کے بعد ہلاکتوں کی تعداد 3 ہو گئی، جبکہ زخمیوں کا علاج جاری ہے۔ پولیس نے بتایا ہے کہ فی الحال عوام کو کوئی فوری خطرہ لاحق نہیں، تاہم واقعے کی مکمل تحقیقات جاری ہیں۔
