گوئٹے مالا میں وسطی امریکہ کے سب سے زیادہ متحرک فیوگو آتش فشاں کے شدید دھماکے کے بعد حکومت نے ملک بھر میں نارنجی (خطرے) کا الرٹ نافذ کر دیا ہے۔ حکام نے آتش فشاں کے قریب واقع دو دیہاتوں سے شہریوں کا انخلا شروع کر دیا ہے تاکہ کسی بھی جانی نقصان سے بچا جا سکے۔
سرکاری ڈیزاسٹر مینجمنٹ ادارے CONRED کے مطابق آتش فشاں سے لاوا بہہ رہا ہے جبکہ راکھ اور دھوئیں کے بادل تقریباً 6 کلومیٹر بلندی تک پہنچ گئے ہیں۔ راکھ کے پھیلاؤ کے باعث قریبی علاقوں میں رہنے والے افراد کو گھروں میں رہنے، ماسک استعمال کرنے اور حکام کی ہدایات پر عمل کرنے کی ہدایت کی گئی ہے۔
حکام نے بتایا کہ فیوگو آتش فشاں دارالحکومت گوئٹے مالا سٹی سے تقریباً 35 کلومیٹر جنوب مغرب میں واقع ہے اور ماضی میں بھی متعدد بار خطرناک انداز میں پھٹ چکا ہے، جس کے باعث ہزاروں افراد کو محفوظ مقامات پر منتقل کرنا پڑا تھا۔ تازہ سرگرمی کے بعد ریسکیو اور امدادی ٹیمیں ہائی الرٹ پر ہیں اور آتش فشاں کی مسلسل نگرانی کی جا رہی ہے۔
ماہرین نے خبردار کیا ہے کہ اگر آتش فشاں کی سرگرمی میں مزید شدت آئی تو راکھ، لاوے اور گرم گیسوں کے تیز بہاؤ سے قریبی آبادیوں کو شدید خطرات لاحق ہو سکتے ہیں، اسی لیے عوام سے اپیل کی گئی ہے کہ وہ افواہوں پر کان نہ دھریں اور صرف سرکاری اعلانات پر عمل کریں۔
