مشرقی انڈونیشیا کے علاقے فلوریس کے قریب ہفتہ 15 اگست کی صبح 7.7 شدت کا طاقتور زلزلہ آیا، جس کے جھٹکوں سے کئی عمارتیں اور مکانات متاثر ہوئے۔ زلزلے کا مرکز فلوریس جزیرے کے قریب، اینڈی شہر سے تقریباً 68 کلومیٹر شمال مغرب میں بتایا گیا۔
زلزلے کے بعد متعدد آفٹر شاکس بھی محسوس کیے گئے، جبکہ شدید جھٹکوں کے باعث شہری گھروں سے نکل کر محفوظ مقامات کی جانب منتقل ہوگئے۔ بعض علاقوں میں عمارتیں منہدم ہونے اور ملبے تلے افراد کے دبے ہونے کی اطلاعات سامنے آئیں۔
زلزلے کے بعد حکام نے سونامی وارننگ جاری کی، جبکہ مختلف ساحلی علاقوں میں ایک میٹر سے کم اونچی لہریں ریکارڈ کی گئیں۔ تقریباً تین گھنٹے بعد سونامی وارننگ ختم کردی گئی۔
تازہ اطلاعات کے مطابق کم از کم 20 افراد جاں بحق اور متعدد زخمی ہوئے ہیں، جبکہ امدادی ادارے ملبے تلے دبے افراد کی تلاش اور متاثرہ علاقوں میں امدادی کارروائیاں جاری رکھے ہوئے ہیں۔
زلزلے کے باعث بجلی اور مواصلاتی نظام بھی متاثر ہوا، جبکہ لینڈ سلائیڈنگ کے باعث بعض علاقوں تک امدادی ٹیموں کی رسائی میں مشکلات پیش آئیں۔ حکام کے مطابق نقصانات اور جانی نقصان کے اعداد و شمار مزید بڑھ سکتے ہیں۔
