انگلینڈ اور پاکستان کے درمیان ہیڈنگلے میں کھیلے گئے پہلے ٹیسٹ کے پہلے روز ایک منفرد واقعہ دیکھنے میں آیا، جہاں انگلش فاسٹ بولرز اولی رابنسن اور جوش ٹنگ نے اپنی شاندار کارکردگی کی یادگار کے طور پر میچ کی گیند کو دو حصوں میں تقسیم کرکے آپس میں بانٹ لیا۔
دونوں بولرز نے پاکستان کی پہلی اننگز میں پانچ، پانچ وکٹیں حاصل کیں۔ رابنسن نے 51 رنز کے عوض 5 وکٹیں جبکہ ٹنگ نے 46 رنز دے کر 5 کھلاڑیوں کو آؤٹ کیا۔ ان کی تباہ کن بولنگ کے باعث پاکستان کی پوری ٹیم 171 رنز پر آؤٹ ہوگئی۔
یہ انگلینڈ کے لیے ایک نایاب کارنامہ بھی تھا، کیونکہ 2006 کے بعد پہلی مرتبہ انگلینڈ کے دو بولرز نے ایک ہی اننگز میں پانچ، پانچ وکٹیں حاصل کیں۔
رابنسن نے بتایا کہ دونوں کھلاڑی میدان سے واپس جاتے ہوئے اس بات پر متفق ہوئے کہ گیند کو نصف نصف کرلیا جائے تاکہ دونوں کے پاس اس یادگار کارکردگی کی نشانی موجود رہے۔ گراؤنڈ اسٹاف کے ایک رکن نے گیند کو کاٹ کر دونوں کو ایک ایک حصہ دے دیا۔
پاکستان کے 171 رنز کے جواب میں انگلینڈ نے پہلے دن کے اختتام تک 2 وکٹوں کے نقصان پر 112 رنز بنا لیے تھے۔ جو روٹ 37 رنز پر ناٹ آؤٹ تھے جبکہ انگلینڈ کو پاکستان کے اسکور سے مزید 59 رنز درکار تھے۔
