آر ایس ایس سربراہ کے دورہ امریکا پر خالصتان حامی سکھوں کا احتجاج

نیو یارک کے میڈیسن اسکوائر گارڈن کے باہر بھارتی حکومت اور ہندو قوم پرستی کی پالیسیوں کے خلاف مظاہرہ کیا گیا، جہاں خالصتان حامی سکھ مظاہرین نے بھارتی حکومت کے خلاف نعرے لگائے۔
مظاہرین نے بھارت میں سکھوں، مسلمانوں اور مسیحیوں کے ساتھ مبینہ امتیازی سلوک اور انسانی حقوق کی صورتحال پر اپنے تحفظات کا اظہار کیا۔ یہ احتجاج آر ایس ایس سربراہ کے نیو یارک دورے کے موقع پر کیا گیا۔
خالصتان حامی تنظیم سکھس فار جسٹس (SFJ) کے جنرل کونسل گُرپت ونت سنگھ پنوں نے آر ایس ایس اور بی جے پی کی قیادت پر بھارت کو مبینہ طور پر ’’ہندو راشٹر‘‘ میں تبدیل کرنے کی کوششوں کا الزام عائد کیا۔
گُرپت ونت سنگھ پنوں نے اپنے خطاب میں 1984 کے آپریشن بلیو اسٹار، 1992 میں بابری مسجد کی شہادت اور منی پور میں مسیحیوں کے خلاف ہونے والے تشدد کا حوالہ دیتے ہوئے بھارتی حکومت کی پالیسیوں پر تنقید کی۔
انہوں نے بھارتی ریاستی اداروں پر بھی سکھوں، مسلمانوں اور مسیحیوں کے خلاف مبینہ طور پر استعمال ہونے کا الزام عائد کیا اور اقلیتوں کے حقوق کے تحفظ پر زور دیا۔
احتجاج کے دوران مظاہرین نے بھارتی حکومت اور ہندو قوم پرستی کے خلاف مختلف نعرے لگائے، جبکہ آر ایس ایس اور بی جے پی کی پالیسیوں پر اپنے شدید تحفظات کا اظہار کیا۔