لاہور ہائیکورٹ کا 39 سال پرانے اراضی کیس پر فیصلہ، تکمیل کا دعویٰ مسترد

لاہور (آئی این پی) لاہور ہائیکورٹ نے39 سالہ پرانے اراضی تنازع سے متعلق فیصلہ سنا دیا۔ عدالت نے 1987 ء کے معاہدہ اراضی کی تکمیل کا دعوی مسترد کر دیا۔ جسٹس مزمل اختر شبیر نے میاں انعام الہی اور دیگر کی جانب سے دائر دوسری اپیل پر فیصلہ جاری کیا۔ درخواست گزاروں نے 27 جولائی1987 ء کو199 کنال9 مرلہ اراضی کے لیے دس لاکھ روپے کے عوض معاہدہ بیع کیا تھا جس میں ایک لاکھ روپے بطور بیعانہ ادا کیے گئے تھے۔ درخواست گزاروں کے مطابق باقی رقم ادا کرکے رجسٹری مکمل کی جانی تھی تاہم فریق مخالف نے معاہدے پر عملدرآمد نہیں کیا۔ عدالت نے قرار دیا کہ معاہدے میں تکمیل کے لئے تین ماہ کی مدت درج تھی تاہم کوئی مخصوص تاریخ مقرر نہیں کی گئی تھی، اس لیے قانونِ تحدیدِ مدت کے آرٹیکل 113 کے تحت مدت کا آغاز اس وقت ہوا جب درخواست گزاروں کو معاہدے سے انکار کا علم ہوا۔ فیصلے کے مطابق درخواست گزاروں کے اپنے گواہ نے بیان دیا کہ تین سیل ڈیڈ کے مسودے 15 ستمبر1987 کو ملک محمد اشرف کو دستخط کے لئے دیئے گئے جنہوں نے اسی روز دستخط کرنے سے انکار کردیا تھا۔ لاہور ہائیکورٹ نے قرار دیا کہ سیل ڈیڈ پر دستخط سے انکار ہی معاہدے پر عملدرآمد سے انکار کا واضح اظہار تھا۔ عدالت نے قرار دیا کہ 15 ستمبر1987 سے تین سال کی مدت شروع ہوئی اور15 ستمبر 1990 کو ختم ہوگئی جبکہ درخواست گزاروں نے معاہدے کی تکمیل کا دعوی دسمبر1997 میں دائر کیا جو مقررہ مدت سے سات سال سے زائد تاخیر سے دائر کیا گیا۔ لاہور ہائیکورٹ نے مزید قرار دیا کہ 26 نومبر 1997 کو بھیجا گیا قانونی نوٹس نئی وجہ دعوی پیدا نہیں کرسکتا کیونکہ ایک مرتبہ قانونی مدت شروع ہوجائے تو بعد میں پیش آنے والا کوئی واقعہ اس مدت کو دوبارہ شروع نہیں کرتا۔ عدالت نے قرار دیا کہ درخواست گزار طویل عرصے تک خاموش رہنے کی بھی تسلی بخش وضاحت نہیں کرسکے۔ عدالت نے قرار دیا کہ ماتحت عدالتوں نے دعوی کو مدتِ معیاد سے باہر قرار دے کر درست فیصلہ کیا، فیصلوں میں کوئی قانونی یا دائرہ اختیار کی خامی نہیں لہذا دوسری اپیل میرٹ نہ ہونے کے باعث خارج کردی گئی۔