لاہور(کرائم رپورٹر)ڈی آئی جی آپریشنز فیصل کامران نے کہا ہے کہ شہریوں کی جان و مال کے تحفظ اور انصاف کی بروقت فراہمی پر کوئی سمجھوتہ نہیں۔ لاہور پولیس کا مقصد صرف مقدمہ درج کرنا نہیں بلکہ متاثرین کو بروقت انصاف فراہم کرنا ہے۔قابلِ دست اندازی جرم میں بلا تاخیر مقدمہ درج کرکے تفتیش شروع کی جائے۔ کھلی کچہری میں جاری احکامات پر عملدرآمد کی باقاعدہ مانیٹرنگ کی جائے گی۔ ان خیالات کا اظہار انہوں نے اپنے دفتر میں کھلی کچہری کے دوران کیا۔ شہریوں کی بڑی تعداد نے کھلی کچہری میں شرکت کی۔ پولیس افسران بھی بذریعہ ویڈیو لنک حاضر رہے۔ کھلی کچہری میں وراثتی تنازعات، ہراسگی، گھریلو جھگڑوں اور فراڈ کی متعدد شکایات موصول ہوئیں۔ فیصل کامران نے متعلقہ ایس ایچ اوز کو ہر شکایت پر فوری قانونی کارروائی اور پیش رفت رپورٹ کرنے،وراثتی تنازعات میں تصادم سے بچانے اور قانون کے مطابق حل یقینی بنانے کی ہدایت کی۔انہوں نے خواتین، بزرگ شہریوں اور خصوصی افراد کی شکایات کو ترجیحی بنیادوں پر نمٹانے کے بھی احکامات دیئے۔ ڈی آئی جی آپریشنزنے کہا کہ ہراسگی، تشدد اور سماجی جرائم میں زیرو ٹالرنس، قانون پر بلاامتیاز عملدرآمد کیا جا رہا ہے۔ انہوں نے کہا کہ اتوار کے روز 12 بجے دن بھی فیس بک پر آن لائن کھلی کچہری لگاتا ہوں۔ ہفتے میں چھ روز دوپہر ایک سے تین بجے تک شہری براہِ راست اپنے مسائل پیش کر سکتے ہیں۔شکایت کے ازالے میں کوتاہی کرنے والے ایس ایچ اوز کی براہِ راست جوابدہی ہوگی۔ علاوہ ازیں
ڈی آئی جی آپریشنز فیصل کامران کی کھلی کچہری میں پیش ہونے والی اجتماعی زیادتی کی شکار خاتون کو انصاف مل گیا۔ گرین ٹائون پولیس نے خاتون سے زیادتی کرنے والے 2 ملزمان گرفتار کر لیئے۔ تفصیلات کے مطابق گرین ٹائون کے علاقہ حاکم ٹائون میں خاتون کو نوکری کا جھانسہ دے کر زیادتی کا نشانہ بنایا گیا۔ نوکری دلوانے کے عوض ملزمان نے خاتون سے50ہزار روپے بھی بٹورے۔ متاثرہ خاتون انصاف کیلئے ڈی آئی جی آپریشنز کی کھلی کچہری میں پہنچ گئی۔ ڈی آئی جی آپریشنزنے واقعہ کا فوری مقدمہ درج کر کے ملزمان کی گرفتاری کیلئے ایس ایچ او گرین ٹائون کو ٹاسک سونپا۔ پولیس ٹیم نے واقعہ میں ملوث دونوں ملزمان کو قلیل وقت میں گرفتار کر لیا۔ ملزمان کی شناخت اللہ دتہ اور عامرکے نام سے ہوئی۔ گرفتار ملزمان کو مزید تفتیش کیلئے انویسٹی گیشن ونگ کے حوالے کر دیا گیا۔
