میجر جنرل (ر) پروفیسر سہیل صابر نے یونیورسٹی آف ہیلتھ سائنسز لاہور کے وی سی عہدے کا چارج سنبھال لیا

لاہور (جنرل رپورٹر) میجر جنرل (ر) پروفیسر سہیل صابر ہلالِ امتیاز (ملٹری) نے یونیورسٹی آف ہیلتھ سائنسز لاہور کے 13ویں وائس چانسلر کی حیثیت سے عہدے کا چارج سنبھال لیا۔ پہلے ہی روز وائس چانسلر نے ایم ڈی کیٹ 2026 کے انتظامات کا جائزہ لیا جو 20 ستمبر کو پنجاب بھر میں منعقد ہوگا۔ انہوں نے یو ایچ ایس کنٹرول روم کا دورہ کیا، متعلقہ افسران اور اہلکاروں سے ملاقات کی اور ان کی ذمہ داریوں کے بارے میں بریفنگ لی۔ انہوں نے امتحان کے شفاف اور منظم انعقاد کے لیے جاری تیاریوں کا بھی جائزہ لیا۔ پروفیسر سہیل صابر میڈیسن اور نیفرولوجی کے ماہر ہیں اور پاک فوج میں 1985 سے اگست 2026 تک خدمات انجام دے چکے ہیں۔ وہ آرمی میڈیکل کالج/NUMS میں پروفیسر آف میڈیسن، اے ایف پی جی ایم آئی کے ڈین اور جی ایچ کیو میں ڈائریکٹر جنرل میڈیسن سمیت اہم تدریسی، طبی اور انتظامی عہدوں پر فائز رہے۔ ان کے پاس پی ایچ ڈی، ایف سی پی ایس میڈیسن و نیفرولوجی، ایف آر سی پی اور آرگن ٹرانسپلانٹ میں ماسٹر سمیت متعدد اعلی پیشہ ورانہ اسناد ہیں۔ ان کی57 قومی اور7 بین الاقوامی تحقیقی اشاعتیں ہیں جبکہ وہ 125 ایف سی پی ایس ٹرینیز کی نگرانی کر چکے ہیں۔پروفیسر سہیل صابر کو ہلالِ امتیاز (ملٹری)، چیف آف آرمی سٹاف کمنڈیشن کارڈ اور میگڈی یعقوب گولڈ میڈل فار ریسرچ سمیت متعدد اعزازات سے نوازا جاچکا ہے۔