کے پی میں امن و امان کی بگڑتی صورتحال قوم کیلئے لمحہ فکریہ ہے:راجہ پرویز اشرف

لاہور (خبر نگار) سابق وزیر اعظم اور پاکستان پیپلز پارٹی وسطی پنجاب صدر راجہ پرویز اشرف نے کوہاٹ  پولیس لائن دھماکے کی شدید الفاظ میں مذمت کرتے ہوئے کہا ہے کہ شہید ہونے والے 15بیگناہ شہریوں اور پولیس اہلکاروں کا خون رائیگاں نہیں جائیگا۔انہوں نے زخمی ہونے والوں کی فوری طبی امداد کا مطالبہ کرتے ہوئے کہا کہ جمعہ کے مقدس روز انسانی جانوں سے کھیلنے والے کسی رعایت کے مستحق نہیں ،دہشت گرد کا کوئی مذہب نہیں ہوتا ،ملکر اس عفریت کو ختم کرنا ہو گا۔سابق وزیر اعظم کا کہنا تھا کہ صوبائی حکومت اور قانون نافذ کرنے والے ادارے دہشت گردی کے پس پردہ محرکات سامنے لائیں کیونکہ کے پی میں امن و امان کی بگڑتی صورتحال ساری قوم کے لئے لمحہ فکریہ ہے۔ راجہ پرویز اشرف نے کہا کہ پاکستان پیپلز پارٹی اور اسکی قیادت دھماکہ متاثرین کیساتھ کھڑی ہے۔