نئے انتظامی یونٹس بننے سے کوئی قتل و غارت نہیں ہوگی’ نئے صوبے سندھ کو عروج پر لے جائیں گے: مصطفی کمال

کراچی (آئی این پی)وفاقی وزیر صحت مصطفی کمال نے کہا ہے کہ نئے انتظامی یونٹس کی بات کسی قوم یا زبان کے خلاف نہیں بلکہ انتظامی معاملات بہتر بنانے کے لیے کی جا رہی ہے، نئے صوبے سندھ کو عروج پر لے جائیں گے۔کراچی میں پریس کانفرنس کرتے ہوئے مصطفی کمال نے کہا کہ نئے انتظامی یونٹس سے متعلق منفی باتیں کی جا رہی ہیں ، سندھ میں نیا انتظامی یونٹ بننے سے کوئی قتل و غارت گری نہیں ہو گی، ہم پاکستان کو توڑنے نہیں بلکہ جوڑنے کی بات کر رہے ہیں۔ان کا کہنا تھا کہ نئے یونٹس بننے سے صحت اور تعلیم کا نظام بہتر ہو گا، پیپلز پارٹی کرپشن چھپانے کے لیے سندھ کارڈ استعمال کرتی ہے۔پاکستان میں نئے صوبوں اور انتظامی یونٹس کا مطالبہ ایک عرصے سے سیاسی بحث کا حصہ ہے، تاہم سندھ کی تقسیم کے معاملے پر پاکستان پیپلز پارٹی کا موقف واضح طور پر مخالف رہا ہے۔