لاہور(کرائم رپورٹر)پنجاب پولیس کی پتنگ بازی اور انسداد پتنگ بازی ایکٹ کی خلاف ورزی کے خلاف کارروائیاں جاری ہیں، رواں سال لاہور سمیت صوبہ بھر میں 10 ہزار 483 ملزمان کو گرفتار کرکے 10 ہزار 39 مقدمات درج کیے گئے اور ملزمان سے 5 لاکھ 20 ہزار 890 پتنگیں اور 16 ہزار 563 ڈور چرخیاں برآمد کی گئیں اسی طرح صوبائی دارالحکومت لاہور میں پتنگ بازی کے خلاف کارروائیوں کے دوران 5 ہزار سے زائد ملزمان کو گرفتار کیا گیا جبکہ 4 ہزار 801 مقدمات درج کیے گئے۔ لاہور میں کارروائیوں کے دوران ایک لاکھ 48 ہزار 316 پتنگیں اور 5 ہزار 901 ڈور چرخیاں بھی برآمد کی گئیں۔آئی جی پنجاب عبدالکریم نے کہا ہے کہ صوبہ بھر میں کسی بھی مقام پر پتنگ بازی ہرگز قابل برداشت نہیں، خلاف ورزی کرنے والوں کے خلاف سخت ایکشن لیا جائے۔ انہوں نے ہدایت کی کہ دھاتی ڈور اور پتنگوں کے آن لائن کاروبار میں ملوث عناصر کو بھی قانون کی گرفت میں لایا جائے۔آئی جی پنجاب نے والدین سے اپیل کی کہ وہ اپنے بچوں کو پتنگ بازی کے اس خطرناک کھیل سے دور رکھیں۔ ان کا کہنا تھا کہ شہری کسی بھی مقام پر پتنگ بازی ہوتے دیکھیں تو فوری طور پر پولیس ایمرجنسی 15 پر اطلاع دے کر ذمہ داری کا ثبوت دیں۔
