کراچی (این این آئی) وزیراعلیٰ سندھ سید مراد علی شاہ نے خصوصی بچوں کے لیے سندھ بھر میں 49 جدید ڈیجیٹل کلاس رومز، 20 سیٹلائٹ اسکولز اور سائن لینگویج ٹیچرز ٹریننگ پروگرام کا افتتاح کر دیا۔
خصوصی تعلیم کی تقریب سے خطاب کرتے ہوئے وزیراعلیٰ سندھ نے کہا کہ 37 اسپیشل ایجوکیشن اینڈ ری ہیبلی ٹیشن سینٹرز میں 49 ڈیجیٹل کلاس رومز قائم کیے گئے ہیں، جہاں اسمارٹ بورڈز، ای لرننگ ٹولز اور جدید تعلیمی سہولیات فراہم کی گئی ہیں۔ جدید ٹیکنالوجی خصوصی بچوں کے تعلیمی تجربے کو مزید بہتر بنائے گی اور انہیں ڈیجیٹل دنیا میں اعتماد کے ساتھ آگے بڑھنے میں مدد دے گی۔ مراد علی شاہ نے کہا کہ تقریب وزیراعلیٰ ہاؤس کے بجائے خصوصی بچوں کے درمیان منعقد کرنے کا فیصلہ کیا تاکہ ان اقدامات کے اصل مستفید ہونے والے بچوں کے ساتھ یہ موقع منایا جاسکے۔ خصوصی بچوں کے درمیان تقریب میں شرکت ان کے لیے باعث اطمینان ہے اور بچوں کے بہتر مستقبل کے لیے مزید محنت کے عزم کو تقویت دیتی ہے۔ انہوں نے کہا کہ سندھ بھر کے 67 خصوصی اداروں میں تقریباً 20 ہزار طلبہ زیر تعلیم ہیں، جہاں انہیں مفت تعلیم، بحالی، فزیوتھراپی اور اسپیچ تھراپی سمیت متعدد سہولیات فراہم کی جا رہی ہیں۔ خصوصی بچوں کو مفت ٹرانسپورٹ اور غذائیت سے بھرپور کھانے کے علاوہ ماہانہ 3 ہزار روپے وظیفہ بھی دیا جا رہا ہے۔ وزیراعلیٰ سندھ نے کہا کہ صرف انفراسٹرکچر اور ٹیکنالوجی کافی نہیں، اصل ترقی انہیں استعمال کرنے والے افراد سے وابستہ ہے۔ اسی لیے ڈیجیٹل تعلیمی اقدامات کے ساتھ سائن لینگویج ٹیچرز ٹریننگ پروگرام بھی شروع کیا گیا ہے۔ انہوں نے کہا کہ ڈیف ریچ اور ایف ای ایس ایف کے تعاون سے شروع کیے گئے تربیتی پروگرام سے اساتذہ کی پیشہ ورانہ صلاحیتوں میں اضافہ ہوگا، جبکہ پاکستان سائن لینگویج کے وسیع استعمال کو فروغ دیا جائے گا کیونکہ یہ رابطے، تعلیم اور شمولیت کا مؤثر ذریعہ ہے۔سید مراد علی شاہ نے کہا کہ اساتذہ میں سرمایہ کاری دراصل بچوں کے مستقبل میں سرمایہ کاری ہے، سندھ حکومت کا عزم ہے کہ کوئی طالب علم تعلیم کے سفر میں پیچھے نہ رہ جائے۔ خصوصی بچوں کی فلاح، تعلیم اور بحالی کے لیے مزید اقدامات جاری رکھے جائیں گے۔ انہوں نے سول سوسائٹی، ترقیاتی شراکت داروں، ڈیف ریچ، ایف ای ایس ایف، محکمہ بااختیاری برائے خصوصی افراد اور اس کی ٹیم کی کاوشوں کو سراہتے ہوئے کہا کہ حکومت گرانٹ ان ایڈ پروگرامز کے ذریعے شراکت دار تنظیموں کی معاونت جاری رکھے گی۔ وزیراعلیٰ سندھ نے خصوصی بچوں کی زندگیوں میں مثبت تبدیلی لانے والے اساتذہ کو خراج تحسین پیش کرتے ہوئے کہا کہ ان کی محنت، لگن اور ہمدردی بچوں کے مستقبل کو بہتر بنانے میں اہم کردار ادا کررہی ہے۔مراد علی شاہ نے کہا کہ 49 ڈیجیٹل کلاس رومز، 20 سیٹلائٹ اسکولز اور سائن لینگویج ٹیچرز ٹریننگ پروگرام محض منصوبے نہیں بلکہ انسانی صلاحیت، وقار اور مساوی مواقع میں سرمایہ کاری ہیں۔ ہر خصوصی بچے کو سیکھنے، آگے بڑھنے اور معاشرے میں مؤثر کردار ادا کرنے کا موقع ملنا چاہیے۔
