شنگھائی(خبریں نیوز) وزیراعظم پاکستان کے نوجوانوں کو جدید فنی و تکنیکی مہارتوں سے آراستہ کرنے اور انہیں عالمی مواقع تک رسائی فراہم
کرنے کے وژن کے تحت پاکستان کی فنی و پیشہ ورانہ تعلیم و تربیت کے شعبے میں ایک اہم سنگِ میل رقم ہو رہا ہے۔ پاکستان پہلی مرتبہ WorldSkills Shanghai 2026 کے عالمی مقابلے میں شرکت کر رہا ہے، جہاں چیئرمین نیشنل ووکیشنل اینڈ ٹیکنیکل ٹریننگ کمیشن (NAVTTC) انجینئر قمر الاسلام راجہ پاکستانی شرکا کے ہمراہ شنگھائی میں موجود ہیں۔WorldSkills فنی و تکنیکی مہارتوں کے عالمی مقابلوں کا انعقاد کرنے والی بین الاقوامی تنظیم ہے، جس کے زیرِ اہتمام WorldSkills Shanghai 2026 اس سال شنگھائی، چین میں منعقد ہو رہا ہے۔ اس عالمی مقابلے میں مختلف ممالک کے نوجوان اپنے متعلقہ شعبوں میں مہارت، درستگی، تخلیقی صلاحیت اور پیشہ ورانہ قابلیت کا مظاہرہ کر رہے ہیں۔ پاکستان کی پہلی شرکت ملک کے TVET شعبے کے لیے ایک اہم پیش رفت اور پاکستانی نوجوانوں کو عالمی سطح پر اپنی صلاحیتیں منوانے کا ایک نیا موقع ہے۔چیئرمین NAVTTC انجینئر قمر الاسلام راجہ کی قیادت اور NAVTTC کی رہنمائی میں پاکستان کی نمائندگی کرنے والے تینوں نوجوانوں نے شنگھائی تک پہنچنے کے لیے ایک منظم اور طویل سفر طے کیا۔ علاقائی و صوبائی مقابلوں سے قومی سطح تک مختلف مراحل میں کامیابی حاصل کرنے کے بعد تینوں نوجوانوں نے WorldSkills PakistanNAVTTC National Skills Competition 2026 میں حصہ لیا۔ قومی سطح پر انتخاب کے بعد انہیں کئی ماہ پر محیط خصوصی تربیتی بوٹ کیمپس کے ذریعے عالمی مقابلے کے تقاضوں کے مطابق تیار کیا گیا۔کراچی سے تعلق رکھنے والے نبید الارفین گرافک ڈیزائن ٹیکنالوجی میں پاکستان کی نمائندگی کر رہے ہیں۔ فن اور ڈیزائن میں دلچسپی سے شروع ہونے والا ان کا سفر علاقائی اور قومی مقابلوں سے گزرتا ہوا عالمی اسٹیج تک پہنچا۔ لاہور کے موحد محبوب کوکنگ کے شعبے میں پاکستان کی نمائندگی کر رہے ہیں۔ بچپن سے کھانا پکانے کے شوق کو انہوں نے باقاعدہ پیشہ ورانہ مہارت میں تبدیل کیا ۔ WorldSkills Pakistan کے مختلف مراحل میں کامیابی کے بعد وہ اب عالمی مقابلے میں پاکستان کی نمائندگی کر رہے ہیں۔بوریوالہ سے تعلق رکھنے والے مدثر حسین الیکٹریکل انسٹالیشن کے شعبے میں پاکستان کی نمائندگی کر رہے ہیں۔ پانچویں جماعت میں ایک مقامی مرمت کی دکان پر کاریگروں کو کام کرتے دیکھنے سے پیدا ہونے والی دلچسپی نے انہیں اس شعبے میں آگے بڑھنے کا جذبہ دیا۔ کالج، علاقائی اور صوبائی مقابلوں میں کامیابی کے بعد انہوں نے قومی مقابلہ جیتا اور مسلسل محنت و تربیت کے ذریعے شنگھائی تک پہنچے۔چیئرمین NAVTTC انجینئر قمر الاسلام راجہ نے شنگھائی میں پاکستانی نوجوانوں کی حوصلہ افزائی کی اور عالمی مقابلے میں بہترین کارکردگی کے لیے نیک خواہشات کا اظہار کیا۔ ان کی موجودگی پاکستانی شرکا کے لیے حوصلہ افزائی کا باعث ہے، جو پہلی مرتبہ عالمی سطح کے اس بڑے فنی مقابلے میں پاکستان کی نمائندگی کر رہے ہیں۔پاکستان کی WorldSkills Shanghai 2026 میں پہلی شرکت نہ صرف ان تین نوجوانوں بلکہ ملک کے پورے TVET شعبے کے لیے ایک اہم پیش رفت ہے۔ یہ شرکت اس عزم کی عکاسی کرتی ہے کہ پاکستانی نوجوانوں کو جدید تربیت، عالمی معیار کے مواقع اور درست رہنمائی فراہم کرکے انہیں مقامی سطح سے عالمی افق تک پہنچایا جائے۔
