کراچی میں مختلف واقعات، خاتون سمیت2 افراد جاں بحق، 2 زخمی

کراچی (این این آئی) شہر قائد کے مختلف علاقوں میں فائرنگ اور دیگر واقعات کے دوران خاتون سمیت 2 افراد جاں بحق جبکہ 2 افراد زخمی ہوگئے۔ ایدھی حکام کے مطابق ہاکس بے کینپ پوائنٹ کے سمندر میں اتوار کی شام نہاتے ہوئے 23 سالہ اسد ڈوب گیا تھا، جس کی لاش ایدھی بحریہ خدمات نے نکال لی۔ متوفی سائٹ ایریا کا رہائشی تھا۔ پولیس کارروائی کے بعد لاش ورثاء کے حوالے کر دی گئی۔ دوسری جانب سہراب گوٹھ کے علاقے لاسی گوٹھ میں گھر کے اندر پراسرار فائرنگ سے 30 سالہ عبدالرزاق زخمی ہوگیا۔ چھیپا حکام کے مطابق زخمی کو طبی امداد کے لیے عباسی شہید ہسپتال منتقل کر دیا گیا۔ اورنگی ٹاؤن سیکٹر 10 کی بسم اللہ کالونی میں فائرنگ کے واقعے میں 18 سالہ زرقا جاں بحق ہوگئی۔ پولیس کے مطابق ابتدائی طور پر واقعہ گھریلو ناچاقی کا شاخسانہ معلوم ہوا، تاہم مزید تحقیقات کے دوران یہ بات سامنے آئی کہ زرقا کو اس کے بھائی نے مبینہ طور پر غیرت کے نام پر قتل کیا۔ پولیس کے مطابق واقعے کے بعد ملزم موقع سے فرار ہوگیا، جس کی تلاش جاری ہے، جبکہ مقتولہ کی لاش قانونی کارروائی کے لیے عباسی شہید ہسپتال منتقل کر دی گئی۔ علاوہ ازیں تین ہٹی پل کے قریب فائرنگ کے واقعے میں 18 سالہ حمزہ ولد ندیم زخمی ہوگیا۔ چھیپا حکام کے مطابق زخمی نوجوان کو طبی امداد کے لیے عباسی شہید ہسپتال منتقل کر دیا گیا۔