کراچی میں20 گھنٹے کی لوڈشیڈنگ ، عوام کی زندگی اجیرن ہوگئی

کراچی (این این آئی) سیاسی و سماجی رہنما  مشتاق الرحمان زاہد نے کراچی میں کے الیکٹرک کی جانب سے مبینہ طور پر 18 سے 20 گھنٹے تک جاری رہنے والی لوڈشیڈنگ پر شدید ردعمل کا اظہار کرتے ہوئے کہا ہے کہ کے الیکٹرک کا قبلہ درست نہ ہوسکا اور ظالمانہ لوڈشیڈنگ کا سلسلہ بدستور جاری ہے، جس کے باعث شہریوں کی زندگی اجیرن ہوگئی ہے۔ مشتاق الرحمان زاہد نے کہا کہ کراچی کے مختلف علاقوں میں شدید گرمی کے باوجود 18 سے 20 گھنٹے تک بجلی کی بندش شہریوں کے لیے اذیت کا باعث بن چکی ہے۔ ایک طرف شہری سارا دن محنت مزدوری کے بعد گھروں کو واپس آتے ہیں تو دوسری جانب بجلی غائب ہوتی ہے، جس سے انہیں آرام میں دشواری کا سامنا کرنا پڑتا ہے، جبکہ بچے اور خواتین بھی شدید پریشانی سے دوچار ہیں۔ انہوں نے کہا کہ نیپرا کے احکامات اور وزیراعظم کے اعلانات کے باوجود بجلی کی طویل بندش کا سلسلہ ختم نہیں ہوسکا۔ ان کے مطابق کے الیکٹرک کو عوام کی مشکلات کا احساس نہیں اور وہ اپنی پالیسی پر قائم ہے، جس کا فوری حل ضروری ہے۔ انہوں نے کہا کہ قصبہ کالونی، اورنگی ٹاؤن، بنارس، منگھو پیر اور ایم پی آر سمیت کراچی کے مختلف علاقوں میں 20، 20 گھنٹے تک لوڈشیڈنگ کی جا رہی ہے، جس کے باعث عوام شدید اذیت میں مبتلا ہیں اور شہری سراپا احتجاج ہیں۔ مشتاق الرحمان زاہد نے کہا کہ شدید گرمی میں طویل لوڈشیڈنگ شہریوں کے لیے ناقابل برداشت ہوچکی ہے، اس کا فوری تدارک ضروری ہے۔ ارباب اختیار کو چاہیے کہ عوام کی مشکلات کا نوٹس لیتے ہوئے کے الیکٹرک کو طویل لوڈشیڈنگ کے خاتمے اور بجلی کی فراہمی معمول پر لانے کا پابند کیا جائے۔ انہوں نے کہا کہ شہریوں نے حکومت سے مطالبہ کیا ہے کہ کے الیکٹرک کے معاملے کا مؤثر حل نکالا جائے اور اگر کمپنی عوام کو بنیادی سہولت فراہم کرنے میں ناکام ہے تو اس کے خلاف قانون کے مطابق کارروائی کی جائے تاکہ کراچی کے شہریوں کو بجلی کی قابلِ اعتماد فراہمی یقینی بنائی جاسکے۔ سیاسی و سماجی رہنما نے بالخصوص قصبہ کالونی اور اس کے اطراف میں 20، 20 گھنٹے کی لوڈشیڈنگ کا ذکر کرتے ہوئے کہا کہ طویل بجلی بندش کے باعث علاقے کے عوام شدید مشکلات سے دوچار ہیں، لہٰذا ارباب اختیار فوری مداخلت کرکے مسئلے کا مستقل حل نکالیں اور شہریوں کو اس اذیت سے نجات دلائیں۔