نیٹ فلیکس سیریز سے متاثر ہوکر بینک ڈکیتی کی:برطانوی نژاد شہری

لاہور(آئی این پی )لاہور میں برطانوی نژادشہری کی بینک ڈکیتی کی تفتیش میں پیشرفت ، پولیس کا کہناہے کہ گرفتار ملزم سبحان چھ سال سکاٹ لینڈ میں ٹیکسی چلاتا رہا، ملزم نے اپریل میں سیالکوٹ سے 45 ہزار میں پستول خریدا۔پولیس نے کہا کہ پستول کے لئے گولیاں 20 ہزار روپے میں ٹھوکر نیاز بیگ سے خریدیں، ملزم واردات سے قبل 16 ستمبر کو پاکستان آیا، واردات کے لئے ملزم نے باقاعدہ بینک کی ریکی کی۔ پولیس کے مطابق بینک کا انتخاب پارکنگ کی جگہ اور نقل و حرکت میں آسانی دیکھ کر کیا، ملزم کو اسلحہ فروخت کرنے والے افراد بھی شامل تفتیش کرلئے ۔گزشتہ روز جنوبی چھانی بھٹہ چوک کے قریب نجی بینک میں ایک ڈاکو نے کیش کائونٹر سے 7لاکھ روپے لوٹ لیے جبکہ دورانِ ڈکیتی ڈاکو انگریزی میں گفتگو بھی کرتا رہا۔واردات کی سی سی ٹی وی فوٹیج بھی سامنے آگئی جس میں دیکھا گیا کہ نقاب پوش مسلح ڈاکو نے دو سکیورٹی گارڈ کو یرغمال بنا کر واردات کی۔ ڈاکو مہنگی کار میں سوار ہو کر بینک آیا اور انگلش بھی بولتا رہا۔ فوٹیج میں دیکھا گیا کہ ڈاکو نے اسلحے کی نوک پر سکیورٹی گارڈ کی مدد سے کار سے سوٹ کیس نکلوایا، جس کے بعد ایک گارڈ پر پستول تان کر دوسرے گارڈ سے اس کا اسلحہ نیچے رکھوا لیا۔ بعد ازاں ڈاکو اسی گارڈ کو پستول کی نوک پر یرغمال بنا کر کیش کائونٹر تک پہنچا۔