واشنگٹن (این این آی )امریکا جاتے ہوئے ائیر ایمبولینس کے سمندر میں گر کر تباہ ہونے کی تصدیق ہو گئی۔حکام نے بتایا کہ بحر اوقیانوس میں واقع جزیرہ برمودا سے امریکی ریاست میسا چوسٹس کے شہر بوسٹن جانے والا طیارہ لاپتہ ہوگیا تھا۔حکام کا بتانا تھا کہ میسا چوسٹس کے جزیرے نانٹکٹ کے قریب سے ملبہ تلاش کر لیا گیا ہے، طیارے میں عملے کے ارکان 4 کینیڈین شہری، ایک مریض اور تیماردار شامل ہیں۔حکام کے مطابق طیارے میں سوار 6 افراد کے زندہ بچنے یا ملنے کی باضابطہ تصدیق نہیں ہوئی، گلف اسٹریم جی G-100 میڈیکل جیٹ میں 6 افراد سوار تھے، طیارہ برمودا ائیرپورٹ سے رات 12:41 پر بوسٹن کیلئے روانہ ہوا تھا اور ہفتے کی رات 1:20 بجے نانٹکٹ کے قریب طیارے سے رابطہ منقطع ہوگیا تھا۔میڈیا رپورٹس میں بتایا گیا ہے کہ امریکی کوسٹ گارڈ کا ہیلی کاپٹرز طیاروں موٹر بوٹس سے سرچ اینڈ ریسکیو جاری ہے، بحر اوقیانوس میں بڑے پیمانے پر سرچ آپریشن رات گئے بھی جاری رہا۔حکام نے مزید بتایا کہ کوسٹ گارڈز نے ہفتے کی رات دیر گئے تصدیق کی کہ نانٹکٹ کے ساحل کے قریب سمندر سے ملنے والا ملبہ اسی طیارے کا ہے، طیارہ غائب ہونے سے پہلے صرف 2 منٹ میں 9ہزار فٹ نیچے گیا، کچھ دیر کیلئے پوزیشن برابر ہوئی، پھر ریڈار سے غائب ہو گیا۔
