دہشت گرد سہولت کاروں کیخلاف سخت کاروائی خیبرپختونخوا میں حکومتی رٹ پر سمجھوتہ نہیں ہو گا گورنر کنڈی

اسلام آباد( ملک منظور احمد)گورنر خیبر پختونخوا فیصل کریم کنڈی نے کہا ہے کہ صوبے بھر میں حکومتی رٹ کے قیام، امن و امان کی صورتحال بہتر بنانے اور قانون کی بالادستی کو یقینی بنانے پر کسی قسم کا سمجھوتہ نہیں کیا
جائے گا۔ امن و امان کی صورتحال خراب کرنے، ریاستی اداروں کو چیلنج کرنے اور عوام کے جان و مال کو نقصان پہنچانے والے عناصر کے خلاف سخت کارروائی کی جائے گی۔ ریاست کی عمل داری ہر صورت برقرار رکھی جائے گی اور کسی کو بھی ریاستی رٹ چیلنج کرنے کی اجازت نہیں دی جائے گی۔ گورنر خیبر پختونخوا فیصل کریم کنڈی نے واضح کیا کہ صوبے میں امن و امان کا قیام حکومت کی اولین ترجیح ہے۔ عوام کے تحفظ، کاروباری سرگرمیوں کے تسلسل اور معمولات زندگی کی بحالی کے لیے قانون نافذ کرنے والے اداروں کو اپنی ذمہ داریاں مؤثر انداز میں ادا کرنا ہوں گی۔ انہوں نے کہا کہ جو عناصر صوبے میں بدامنی پھیلانے یا امن و امان کی صورتحال کو خراب کرنے کی کوشش کریں گے، ان کے خلاف قانون کے مطابق سخت کارروائی عمل میں لائی جائے گی۔ فیصل کریم کنڈی نے خبریں سے خصوصی گفتگو کرتے ہوئے کہا کہ دہشت گردی کے مکمل خاتمے کے لیے مؤثر اور فیصلہ کن اقدامات ناگزیر ہیں۔ دہشت گردوں اور انتہا پسند عناصر کے خلاف کارروائیوں کو مزید مؤثر بنایا جائے گا، جبکہ دہشت گردوں کو مالی، انتظامی یا کسی بھی دوسری قسم کی مدد فراہم کرنے والے سہولت کاروں کو بھی قانون کے کٹہرے میں لایا جائے گا۔ دہشت گردی کے خلاف کارروائیوں کا مقصد صوبے میں پائیدار امن قائم کرنا اور شہریوں کو خوف و ہراس سے نجات دلانا ہے۔ گورنر خیبر پختونخوا نے اس عزم کا اظہار کیا کہ ریاست کی عمل داری کے قیام کے لیے تمام ضروری اقدامات کیے جائیں گے۔ انہوں نے کہا کہ امن و امان کو نقصان پہنچانے والے عناصر کے خلاف کسی قسم کی نرمی نہیں برتی جائے گی اور قانون کی خلاف ورزی کرنے والوں کو جواب دہ ہونا پڑے گا۔ صوبے میں امن قائم کرنے کے لیے متعلقہ اداروں کے درمیان مؤثر رابطہ اور تعاون بھی انتہائی اہمیت کا حامل ہے۔ فیصل کریم کنڈی نے کہا کہ خیبر پختونخوا کے عوام دہشت گردی کے باعث طویل عرصے سے مشکلات کا سامنا کر رہے ہیں۔ دہشت گردی نے صوبے کے امن، معیشت اور سماجی زندگی کو متاثر کیا ہے، اس لیے اب وقت آگیا ہے کہ دہشت گردی کے خاتمے کے لیے مربوط حکمت عملی کے تحت فیصلہ کن اقدامات کیے جائیں۔ انہوں نے اس امید کا اظہار کیا کہ عوام اور ریاستی ادارے مل کر دہشت گردی کے خلاف مؤثر کردار ادا کریں گے۔ گورنر کے مطابق خیبر پختونخوا کے عوام امن چاہتے ہیں اور وہ ایسے اقدامات کی حمایت کرتے ہیں جن کے نتیجے میں صوبے میں امن و استحکام بحال ہو۔ انہوں نے دعویٰ کیا کہ صوبے کے عوام نے ایمرجنسی اور گورنر راج کے اقدامات کا خیر مقدم کیا ہے۔ ان کا کہنا تھا کہ موجودہ حالات میں امن و امان کی بحالی اور ریاستی رٹ کو مضبوط بنانا انتہائی ضروری ہے تاکہ عوام کو محفوظ ماحول فراہم کیا جا سکے۔ فیصل کریم کنڈی نے مزید کہا کہ دہشت گردی کے خلاف جنگ صرف سکیورٹی اداروں کی ذمہ داری نہیں بلکہ اس میں عوام کا تعاون بھی بنیادی اہمیت رکھتا ہے۔ دہشت گردوں اور ان کے سہولت کاروں کے نیٹ ورکس کا خاتمہ، قانون کی بالادستی اور عوام کے تحفظ کو یقینی بنانے کے لیے اجتماعی کوششوں کی ضرورت ہے۔ گورنر خیبر پختونخوا نے اس عزم کا اعادہ کیا کہ صوبے میں امن و امان کی بحالی، دہشت گردی کے خاتمے اور ریاستی رٹ کے قیام کے لیے اقدامات جاری رکھے جائیں گے۔ انہوں نے واضح کیا کہ کسی بھی فرد یا گروہ کو قانون سے بالاتر نہیں سمجھا جائے گا اور صوبے کے عوام کے جان و مال کا تحفظ ہر صورت یقینی بنانے کی کوشش کی جائے گی۔
فیصل کنڈی