کراچی، گڑھی خدا بخش (نیوز ایجنسیاں )پاکستان پیپلز پارٹی کے چیئرمین بلاول بھٹو زرداری نے سانحہ کارساز کے شہدا کو خراجِ عقیدت پیش کرتے ہوئے کہا ہے کہ 18اکتوبر پاکستان کی تاریخ کا سیاہ دن ہے۔بلاول بھٹو زرداری نے کہا کہ جب شہید بینظیر بھٹو کی وطن واپسی پر دہشت گردی کے ذریعے انہیں نشانہ بنانے کی بزدلانہ کوشش کی گئی تاہم ان کے استقبال کے لیے آنے والے جیالوں نے اپنی جانوں کا نذرانہ پیش کرکے اپنی قائد کی حفاظت کی اور جمہوریت و عوام کے حقِ حکمرانی سے اپنی غیر متزلزل وابستگی کا بے مثال عملی ثبوت دیا۔پی پی پی چیئرمین نے کہا کہ سانحہ کارساز کے شہدا کا لہو گواہی دیتا ہے کہ دہشت گردی، انتہاپسندی اور تشدد جمہوریت کے عزم کو متزلزل نہیں کر سکتے، سانحہ کارساز کے شہدا کی قربانیاں قومی تاریخ کا ایسا روشن باب ہیں جسے قوم ہمیشہ یاد رکھے گی۔چیئرمین بلاول بھٹو زرداری نے کہا کہ قائدِ عوام شہید ذوالفقار علی بھٹو اور شہید بینظیر بھٹو کا مشن آئین کی بالادستی، عوام کی حکمرانی، مساوات، سماجی انصاف اور ایک پرامن، خوشحال و ترقی یافتہ پاکستان کی تعمیر ہے، پاکستان پیپلز پارٹی اسی مشن پر کاربند رہتے ہوئے جمہوری اداروں کے استحکام، آئین کے تحفظ اور عوام کے حقوق کی پاسداری کے لیے اپنی جدوجہد جاری رکھے گی۔چیئرمین نے شہدا کے درجات کی بلندی اور ان کے اہلِ خانہ کے لیے صبرِ جمیل کی دعا کرتے ہوئے کہا کہ سانح کارساز کے شہدا کی یاد جمہوریت، ثابت قدمی اور قربانی کے اس عہد کی تجدید ہے جسے آنے والی نسلیں بھی مشعلِ راہ بنائیں گی، ان کی قربانیاں ہمیشہ اس عزم کی یاد دلاتی رہیں گی کہ عوام کی حکمرانی اور جمہوری اقدار کے تحفظ کی جدوجہد جاری رہے گی۔دریں اثناء سانحہ کارساز کے شہدا کی 19ویں برسی گڑھی خدا بخش بھٹو میں جان نثارانِ بے نظیر قبرستان میں عقیدت و احترام کے ساتھ منائی جا گئی ۔تقریب میں شرکا نے جذباتی انداز میں نعرے لگاتے ہوئے شہدا کو خراجِ عقیدت پیش کیا، سانحہ کارساز کے 20 شہدا، جنہیں میں بھٹو ہوں کا نام دیا گیا تھا، کی قبروں پر حاضری دی گئی، پھول چڑھائے گئے اور فاتحہ خوانی کرکے انہیں خراجِ عقیدت پیش کیا گیا۔
بلاول بھٹو
