بنیادی مرکزِ صحت سانگھڑی کی نئی عمارت کی تعمیر کا افتتاح کر دیاگیا

میرپورماتھیلو ( نمائندہ خبریں) صوبائی وزیر زراعت اور انسدادِ بدعنوانی سندھ سردار محمد بخش خان مہر نے پی پی ایچ آئی کی جانب سے بنیادی مرکزِ صحت سانگھڑی کی نئی عمارت کی تعمیر کا افتتاح کر دیا۔ اس موقع پر ڈپٹی کمشنر گھوٹکی ایٹ میرپورماتھیلو منظور احمد کنرانی، ڈسٹرکٹ منیجر پی پی ایچ آئی میرپورماتھیلو محمد عارف عباسی اور تحصیلدار شاہد دایو سمیت دیگر متعلقہ افراد بھی موجود تھے۔ میڈیا سے بات چیت کرتے ہوئے صوبائی وزیر زراعت اور انسداد بدعنوانی سندھ سردار محمد بخش خان مہر نے کہا کہ پی پی ایچ آئی عوام کو صحت کی سہولیات فراہم کرنے کے لیے بہت اچھا کام کر رہی ہے۔ پی پی ایچ آئی کے زیرِ انتظام طبی مراکز کے ذریعے لوگوں کو بنیادی صحت کی سہولیات فراہم کرنا قابلِ تحسین اقدام ہے۔ انہوں نے کہا کہ سندھ حکومت عوام کو زیادہ سے زیادہ طبی سہولیات فراہم کرنے کے لیے پُرعزم ہے اور صحت کے شعبے میں عوامی ضروریات کو ترجیح دی جا رہی ہے۔ بنیادی مرکزِ صحت سانگھڑی کی نئی عمارت کی تعمیر سے علاقے کے لوگوں کو صحت کی سہولیات کی فراہمی میں مزید بہتری آئے گی۔ انہوں نے مزید کہا کہ علاقے میں خراب سڑکوں کی تعمیر و مرمت کے لیے بھی اقدامات کیے جائیں گے تاکہ عوام کو آمدورفت میں درپیش مشکلات سے نجات مل سکے۔ تقریب کے موقع پر میڈیا سے گفتگو کرتے ہوئے پی پی ایچ آئی سندھ ضلع گھوٹکی کے ڈسٹرکٹ منیجر محمد عارف عباسی نے کہا کہ پی پی ایچ آئی کے زیرِ انتظام طبی مراکز میں عوام کو بنیادی صحت کی سہولیات مفت فراہم کی جا رہی ہیں۔ مریضوں کے معائنے اور علاج کے لیے کوئی فیس وصول نہیں کی جاتی، جبکہ ادویات اور ڈرپ بھی مفت فراہم کی جاتی ہے۔ محمد عارف عباسی نے بتایا کہ طبی مراکز میں حمل کے ٹیسٹ، بلڈ شوگر ٹیسٹ اور الٹراساؤنڈ سمیت مختلف تشخیصی سہولیات بھی فراہم کی جا رہی ہیں۔ ان سہولیات کا مقصد علاقے کے عوام کو ان کی دہلیز پر بنیادی طبی خدمات فراہم کرنا اور علاج معالجے کے لیے دور دراز علاقوں کا سفر کرنے کی مشکلات سے بچانا ہے ۔