فتح جنگ (بیورو رپورٹ) نورانی نعت کونسل انٹرنیشنل کے چیف آرگنائزر صاحبزادہ محمد عثمان نورانی نے کہا ہے کہ 2027ء کا نعتیہ مقابلہ نوجوان نسل کے دلوں میں عشقِ رسول ۖ کی شمع روشن کرنے، نعت خوانی کے پاکیزہ ذوق کو پروان چڑھانے اور نئی نسل کو سیرتِ طیبہ ۖ کی تعلیمات سے روشناس کرانے میں اہم کردار ادا کرے گا۔ ملک بھر میں نورانی نعت کونسل انٹرنیشنل کی تنظیمات تشکیل دینے کا عمل جاری ہے، جس کا مقصد نعتِ رسولِ مقبول ۖ کے فروغ کے ساتھ نوجوانوں کی دینی، اخلاقی اور روحانی تربیت کے لیے مؤثر پلیٹ فارم فراہم کرنا ہے۔کنیال شریف حافظ سعید احمد کی رہائش گاہ پر اپنے اعزاز میں دئیے گئے استقبالیہ کے بعد میڈیا سے گفتگو کرتے ہوئے صاحبزادہ محمد عثمان نورانی نے بتایا کہ 25 اکتوبر 2026ء کو نورانی نعت کونسل انٹرنیشنل کے مرکزی عہدیداران ملک بھر کا دورہ شروع کریں گے۔ پہلے مرحلے میں شمالی پنجاب، دوسرے مرحلے میں جنوبی پنجاب، تیسرے مرحلے میں وسطی پنجاب اور چوتھے مرحلے میں اندرونِ سندھ کے تمام اضلاع کا دورہ کیا جائے گا۔ اس دورے کے دوران مختلف اضلاع میں نورانی نعت کونسل انٹرنیشنل کے زیرِ اہتمام نعتیہ مقابلے منعقد کیے جائیں گے، جبکہ تنظیم سازی بھی کی جائے گی۔انہوں نے کہا کہ نعتِ رسول ۖ محض اظہارِ عقیدت کا نام نہیں بلکہ یہ محبتِ مصطفیٰ ۖ کو دلوں میں راسخ کرنے، اخلاق و کردار سنوارنے اور زندگیوں کو تعلیماتِ نبوی ۖ کے مطابق ڈھالنے کا ایک مؤثر ذریعہ ہے۔ نعت خوانی کی محافل میں درود و سلام، سیرتِ طیبہ ۖ کے روشن پہلوؤں اور اسوہ حسنہ کے پیغام کو بھی اجاگر کیا جانا چاہیے، تاکہ نوجوان نسل عشقِ رسول ۖ کے ساتھ آپ ۖ کی تعلیمات پر عمل کرنے کا جذبہ بھی اپنے اندر پیدا کرے۔صاحبزادہ محمد عثمان نورانی نے مزید کہا کہ موجودہ دور میں نوجوانوں کو بے حیائی، فحاشی، اخلاقی انحطاط اور بے راہ روی جیسے چیلنجز سے محفوظ رکھنے کے لیے مثبت دینی و تربیتی سرگرمیوں کو فروغ دینا وقت کی اہم ضرورت ہے
