ستھرا پنجاب پروگرام کے تحت صفائی چارجز کو مسترد کرتے ہیں،ملک شاہد

راولپنڈی(خصوصی رپورٹر) مرکزی انجمن تاجران راولپنڈی و پنجاب کے صدر ملک شاہد غفور پراچہ، مرکزی انجمن تاجران راولپنڈی کے جنرل سیکرٹری راجہ توحید احمد اور دیگر مرکزی عہدیداران نے ستھرا پنجاب کے نئے صفائی چارجز مسترد کرتے ہوئے کہا ہے کہ ستھرا پنجاب پروگرام کے تحت دکانوں اور تجارتی مراکز پر عائد کیے جانے والے ماہانہ صفائی چارجز کو مسترد کرتے ہیں پہلے ہی مہنگائی، بجلی و گیس کے بھاری بلوں، مختلف ٹیکسوں اور کاروباری اخراجات سے پریشان تاجر برادری پر مزید مالی بوجھ ڈالنا کسی صورت قابلِ قبول نہیں،ہم ستھرا پنجاب کے تحت عائد کیے جانے والے نئے صفائی چارجز کو مسترد کرتے ہیں اور حکومتِ پنجاب سے مطالبہ کرتے ہیں کہ اس اضافی وصولی کے فیصلے کو واپس لیا جائے۔ تاجر برادری پر مزید مالی بوجھ ڈالنے کے بجائے موجودہ نظام میں شفافیت، جواب دہی اور کاروباری طبقے کے مفادات کا تحفظ یقینی بنایا جائے۔ ان خیالات کا اظہار انہوںنے راولپنڈی پریس کلب میں پریس کانفرنس سے خطاب کرتے ہوئے کیا۔ اس موقع پرصدر فرنیچر ایسوسی سردار ثاقب نسیم، رانا خرم صدر چیمبر آف سمال ٹریڈرز اینڈ سمال انڈسٹری، طارق خان جدون،صدر چائنا مارکیٹ ، صدر ملک ایسوسی ایشن ملک وقار، ظہیر عباسی صدر چکن ایسوسی ایشن کے علاوہ تاجروں کی بڑی تعداد موجود تھی ۔ملک شاہد غفور پراچہ اور دیگر رہنمائوںنے کہا کہ تاجر پہلے ہی مختلف سرکاری محکموں کو ٹیکس اور خدمات کے عوض چارجز ادا کر رہے ہیں۔ ایسے میں یہ سوال پیدا ہوتا ہے کہ جب پراپرٹی ٹیکس اور واسا کے بلوں میں متعلقہ بلدیاتی و صفائی کی مدات کے حوالے سے وصولیاں موجود ہیں تو پھر ستھرا پنجاب کے تحت الگ سے صفائی بل جاری کرکے تاجروں پر اضافی مالی ذمہ داری کیوں عائد کی جا رہی ہے؟ حکومت واضح کرے کہ ان مختلف وصولیوں کی قانونی بنیاد، دائر کار اور فراہم کی جانے والی خدمات میں فرق کیا ہے۔ سردار ثاقب نسیم، رانا خرم نے کہا کہ اگر صفائی اور متعلقہ بلدیاتی خدمات کے اخراجات پہلے ہی کسی ٹیکس یا بل میں شامل ہیں تو انہی خدمات کے نام پر دوبارہ رقم وصول کرنے کے معاملے کی مکمل وضاحت ضروری ہے۔ تاجر برادری یہ جاننے کا حق رکھتی ہے کہ پراپرٹی ٹیکس، واسا کے بل اور ستھرا پنجاب کے نئے چارجز الگ الگ کن خدمات کے عوض وصول کیے جا رہے ہیں۔ محض مختلف اداروں کے ذریعے بل جاری کرنے سے ایک ہی نوعیت کی خدمات کے لیے بار بار مالی بوجھ ڈالنے کا جواز پیدا نہیں ہوتا۔مرکزی انجمن تاجران کے رہنمائوں نے واضح کیا کہ ستھرا پنجاب کے نئے صفائی چارجز کو مسترد کیا جاتا ہے۔ تاجر برادری پہلے ہی بجلی کے بلوں میں مختلف ٹیکسوں، پنجاب ریونیو اتھارٹی (PRA) کے نظام اور دیگر کاروباری اخراجات سے متعلق مشکلات کا سامنا کر رہی ہے۔ ان حالات میں نئے چارجز کاروبار کرنے کی لاگت میں مزید اضافے کا باعث بنیں گے، جس کا اثر بالخصوص چھوٹے دکانداروں پر پڑے گا۔ راجہ توحید احمد،طارق خان جدون نے مزید کہا کہ صفائی کا مثر نظام حکومت کی ذمہ داری ہے اور تاجر برادری بھی صاف ستھرے ماحول کی خواہاں ہے، لیکن صفائی کے نام پر اضافی وصولیوں کو اس وقت تک قبول نہیں کیا جا سکتا جب تک موجودہ ٹیکسوں، وصولیوں اور خدمات کی تفصیلات واضح نہ ہوں۔ حکومت کو یہ بھی بتانا ہوگا کہ نئے چارجز کے عوض کون سی اضافی خدمات فراہم کی جائیں گی اور ان رقوم کے استعمال کا حساب کس طرح رکھا جائے گا۔مرکزی انجمن تاجران راولپنڈی کا موقف ہے کہ تاجروں پر نئے صفائی چارجز مسلط کرنے کے بجائے پہلے سے موجود محصولات اور متعلقہ بلوں کا مکمل جائزہ لیا جائے۔ ہم ستھرا پنجاب کے تحت عائد کیے جانے والے نئے صفائی چارجز کو مسترد کرتے ہیں اور حکومتِ پنجاب سے مطالبہ کرتے ہیں کہ اس اضافی وصولی کے فیصلے کو واپس لیا جائے۔ تاجر برادری پر مزید مالی بوجھ ڈالنے کے بجائے موجودہ نظام میں شفافیت، جواب دہی اور کاروباری طبقے کے مفادات کا تحفظ یقینی بنایا جائے۔