ٹرمپ کا کنساس اور آئیووا میں دو انتخابی ریلیاں منسوخ کرنیکا فیصلہ واپس

واشنگٹن (این این آئی) امریکی صدر ڈونلڈ ٹرمپ نے مڈٹرم انتخابات شروع ہونے سے دو دن قبل اتوار کے دن کے لیے ریاستِ کنساس اور آئیووا میں اپنی انتخابی مہم کے شیڈول میں دو انتخابی ریلیاں دوبارہ شامل کرلی ہیں۔ ریپبلکن پارٹی کے ایک ذریعے نے یہ بتایا۔ قبل ازیں انہوں نے اس سے قبل انہیں اچانک منسوخ کر دیا تھا۔ ان اچانک تبدیلیوں نے 80 سالہ صدر کی صحت اور ان کی برداشت کی صلاحیت پر سوالات کھڑے کر دیئے تھے جس پر صحافی کے یہ پوچھنے پر کہ کیا وہ اچھا محسوس کر رہے ہیں؟ ان کی طرف سے شدید برہمی کا ردِعمل سامنے آیا تھا۔ ٹرمپ نے سوال کا غصے سے جواب دیتے ہوئے کہا کہ میں بہترین محسوس کر رہا ہوں۔ انہوں نے مزید کہا کہ انہیں اب کنساس جانے کی ضرورت نہیں کیونکہ ریپبلکن سینیٹر روجر مارشل بہت اچھی کارکردگی دکھا رہے ہیں۔ انہوں نے کہا کہ میں اپنی بہترین حالت میں ہوں۔ تم گھنائونے آدمی ہو۔ اپنا خیال رکھو، تم خود کافی خراب حال میں لگ رہے ہو۔