حوثیوں نے عدن میں صدارتی محل اور بین الاقوامی ہوائی اڈے پر بیلسٹک میزائلوں سے حملے کیے: یمنی فورسز

صنعا، نیویارک (آئی این پی) یمن کی حکومتی فورسز نے کہا ہے کہ حوثیوں نے عدن کے بین الاقوامی ہوائی اڈے اور صدارتی محل کو بیلسٹک میزائلوں سے نشانہ بنایا ہے۔ عرب میڈیا کے مطابق حکومتی فورسز کے ترجمان ماجد النزیلی نے سوشل میڈیا پر جاری بیان میں کہا کہ حوثی ملیشیا مسلسل یمنی عوام کی املاک اور تنصیبات کو نشانہ بنا رہی ہے۔ ادھر یمن کی حکومت نے اقوام متحدہ کی سلامتی کونسل سے مطالبہ کیا ہے کہ وہ عدن کے بین الاقوامی ہوائی اڈے پر حوثی انصار اللہ گروپ کے بار بار حملوں کی مذمت کرے اور شہریوں و شہری تنصیبات کے تحفظ کیلئے موثر اقدامات کرے۔ حکومت نے اسلحے کی پابندی پر عملدرآمد یقینی بنانے کا مطالبہ بھی کیا ہے۔ یہ مطالبہ اقوام متحدہ میں یمن کے مستقل مندوب سفیر عبداللہ السعدی نے سلامتی کونسل کے صدر کو لکھے گئے خط میں کیا۔ السعدی کے مطابق، حوثی جنگجوئوں نے 28 اکتوبر کو عدن کے بین الاقوامی ہوائی اڈے کو بیلسٹک میزائلوں سے نشانہ بنایا۔ ان کا کہنا تھا کہ رواں ماہ ہوائی اڈے پر یہ چھٹا حملہ تھا۔ ان حملوں سے مسافروں اور ہوائی اڈے کے عملے کی زندگیاں خطرے میں پڑیں جبکہ متعدد پروازوں کا رخ بھی تبدیل کرنا پڑا۔ یمنی حکومت نے شہری ہوائی اڈے کو نشانہ بنانے کو جنگی جرم اور مسافروں، پروازوں کے عملے اور ہوائی اڈے کے کارکنوں کی زندگیوں کے لیے براہِ راست خطرہ قرار دیا۔ حکومت کا کہنا تھا کہ شہری تنصیبات کو بار بار نشانہ بنائے جانے پر عالمی برادری کو محض تشویش اور مذمت کے بیانات سے آگے بڑھ کر عملی اقدامات کرنا ہوں گے تاکہ شہری ہوائی اڈوں کا تحفظ یقینی بنایا جاسکے اور حملوں کے ذمہ داروں کا احتساب ہو۔