اسلام آباد، لاہور (نیوز ایجنسیاں) جمعیت علمائے اسلام (ف )کے سربراہ مولانا فضل الرحمن کے صاحبزادے اور سابق وفاقی وزیرِ مواصلات اسعد محمود کو مبینہ غیر قانونی بھرتیوں کے معاملے پر قومی احتساب بیورو (نیب)نے طلب کر لیا۔ نیب راولپنڈی نے اسعد محمود کو 10نومبر کو صبح 11بجے پیش ہونے کا نوٹس جاری کر دیا۔نوٹس کے مطابق اسعد محمود کے دورِ وزارت (2022 تا 2023)کے دوران پاکستان پوسٹ آفس میں ہونے والی مبینہ بے ضابطگیوں کی تحقیقات جاری ہیں۔نیب کے مطابق اسٹیبلشمنٹ ڈویژن نے پاکستان پوسٹ آفس میں 3ہزار 938اسامیوں پر بھرتیوں کی اجازت دی تھی تاہم مبینہ طور پر 4ہزار 252افراد بھرتی کیے گئے۔نوٹس میں الزام عائد کیا گیا کہ کابینہ کمیٹی کی ہدایات کے برخلاف 2ہزار 646ختم شدہ اسامیوں پر بھی بھرتیاں کی گئیں۔نیب کے مطابق کنٹریکٹ بنیادوں پر ٹیسٹنگ ایجنسی کے ذریعے بھرتیوں کی سفارش کے باوجود مستقل تقرریاں کی گئیں۔نوٹس میں جعلی اور بوگس دستاویزات، زائد العمر امیدواروں کی بھرتیوں اور ڈومیسائل کوٹے کی خلاف ورزیوں کے الزامات بھی شامل ہیں۔نیب نے خبردار کیا کہ طلبی کے نوٹس پر عمل نہ کرنے کی صورت میں قومی احتساب آرڈیننس 1999 کی دفعہ 31 کے تحت قانونی کارروائی کی جا سکتی ہے۔دوسری جانب وفاقی تحقیقاتی ادارے (ایف آئی اے)کے اینٹی کرپشن سرکل اسلام آباد نے بھی اسعد محمود کو طلبی کا نوٹس جاری کیا تھا۔ایف آئی اے نے انہیں 2 نومبر کو صبح 11 بجے پاکستان پوسٹ آفس میں بھرتیوں سے متعلق مبینہ سنگین بے ضابطگیوں اور بدعنوانی کی تحقیقات کے سلسلے میں بیان ریکارڈ کرانے کے لیے طلب کیا تھا۔ادھر مالی بے ضابطگیاں اور قانونی خلاف ورزیاں ،سربراہ جے یو آ ئی ( ف) مولانا فضل الرحمان کو ایک اور دھچکا ، رفقا کیخلاف بھی مختلف ادارے متحرک ، قریبی ساتھی کو نوٹس جاری کر دیئے گئے ۔تفصیل کے مطابق مولانا فضل الرحمان کے قریبی ساتھی امان اللہ کو ایف آئی اے اور سی ڈی اے کے نوٹس جاری کیے گئے ہیں ۔ مولانا فضل الرحمان کے اہل خانہ اور قریبی رفقا کے خلاف مالی بے ضابطگیوں اور قانونی خلاف ورزیوں پر مختلف ادارے متحرک ہو چکے ہیں ۔مولانا فضل الرحمان کے قریبی ساتھی امان اللہ کو ایف آئی اے کمرشل بینکنگ سرکل نے بیان ریکارڈ کرانے کے لیے طلب کر لیا ہے۔امان اللہ کو ایف آئی اے نے متعلقہ انکوائری میں دستاویزی اور ڈیجیٹل شواہد سمیت 4 نومبر کو پیش ہونے کی ہدایت کی گئی ہے ۔امان اللہ کو اسلام آباد میں غیر قانونی تعمیرات اور سرکاری اراضی پر تجاوزات کے خلاف سی ڈی اے کا نوٹس جاری کیا گیا ہے ۔واضح رہے کہ مولانا فضل الرحمان کے قریبی حلقوں سے وابستہ متعدد افراد کو ایف آئی اے کی تحقیقات کا سامنا ہے ۔ امان اللہ G-6/4گلی نمبر 83اسلام آباد میں اس گھر کے مالک ہیں جس میں مولانا فضل الرحمان رہائش پذیر ہیں ۔
اسعد محمود
