ریال میڈرڈ کارونالڈو کو فروخت کرنےکا فیصلہ

میڈرڈ(آئی این پی) ہسپانوی کلب رئیل میڈرڈ نے عالمی شہرت یافتہ پرتگالی اسٹار کھلاڑی کرسٹیانو رونالڈو کو فروخت کرنے کا فیصلہ کرلیا ہے جبکہ رونالڈو بھی کلب چھوڑنا چاہتے ہیں۔اطالوی کلب جووینٹس کے ذرائع نے دعوی کیا ہے کہ کرسٹیانو رونالڈو نے جیوونٹس کے ساتھ 8کروڑ 80لاکھ برطانوی پاو¿نڈز کی مالیت کے معاہدے پر دستخط کئے ہیں اور میڈیکل ٹیسٹ بھی پاس کرلیاہے۔پرتگالی فٹبال ٹیم کے33سالہ کپتان رونالڈو کی موجودگی میں رئیل میڈرڈ مسلسل3چیمپیئنز لیگ جیت چکا ہے لیکن اب دنیا کے اس معروف فٹبالر کی کارکردگی ویسی نہیں رہی جیسی کلب کو ضرورت ہے ۔فیفا ورلڈ کپ میں ماسوائے ایک گروپ میچ کے ان کی کارکردگی بہت اچھی نہیں رہی اور پرتگال کی ٹیم ناک آوٹ مرحلے میں ہی فیفا ورلڈ کپ سے باہر ہوگئی ۔اطالوی کلب جوونٹس رونالڈو کو خریدنے کا خواہاں ہے لیکن رئیل میڈرڈ کی جانب سے لگائی جانے والی 88 ملین پونڈ قیمت کی ادائیگی بھی ایک بڑا سوال ہے ۔رونالڈو جب تک کامیاب تھے اور ورلڈ کپ سے قبل ان کی مقبولیت عروج پر تھی تو ان کی کمرشل اہمیت بھی زیادہ تھی ۔ ورلڈکپ میں ناکامی اور بڑھتی ہوئی عمر ان کیلئے بڑے معاہدے کی راہ میں رکاوٹ ہے۔جوونٹس نے رونالڈو کے حصول کی کوششوں کے بارے میں کوئی تصدیق یا تردید نہیں کی۔فٹبال حلقوں کے مطابق کسی بھی ٹرانسفر میں ریئل میڈرڈ کے اطمینان کے ساتھ ساتھ رونالڈو کی جانب سے جوونٹس یا کسی اور کلب سے طلب کی جانے والی تنخواہ کا معاملہ بھی اہم ہوگا۔ بتایا گیا ہے کہ رونالڈونئے کلب سے 4سالہ معاہدہ کرنا چاہیں گے جس کی مالیت 26.5ملین پونڈ فی سیزن ہونی چاہئے۔اب یہ واضح نہیں کہ جوونٹس 88ملین پونڈ ٹرانسفر فیس کے ساتھ رونالڈوکو 4سال کیلئے106ملین پونڈ تنخواہ دینے پر راضی ہوگا یا نہیں۔