پنجاب کمپنیز سکینڈل ۔۔۔ 70 سے زائد اعلیٰ افسروں کے اہلخانہ بھی نیب کے شکنجے میں آ گئے

لاہور (آن لائن) سابقہ دور حکومت میں قائم کی جانے والی 56 سرکاری کمپنیوں کے اعلیٰ افسران اور ان کے اہل خانہ بھی نیب کے شکنجے میں آگئے ہیں اس سلسلے میں نیب لاہور نے پنجاب کی 56 کمپنیوں کے 70 سے زائد اعلیٰ افسران اور ان کے اہلخانہ سے متعلق اثاثہ جات ،بینک اکاﺅنٹس اور ان کے نام پر رجسٹرڈ گاڑیوں کی تفصیلات طلب کرلی ہیں یہ بھی بتایاگیا ہے کہ نیب لاہور نے اس سلسلے میں محکمہ ایکسائز اینڈ ٹیکسیشن پنجاب کو مراسلہ جاری کر دیا ہے جس میں محکمہ ایکسائز اینڈ ٹیکسیشن سے 56 کمپنیوں کے کرتا دھرتا افسران کی گاڑیوں،جائیدادوں کی تفصیلات طلب کی ہیں نیب لاہور نے 56 کمپنیوں کے جن افسران کے نام محکمہ ایکسائز اینڈ ٹیکسیشن کو فراہم کئے ہیں ان میں ایم ڈی سیف سٹی اتھارٹی علی عامر ملک،ایم ڈی نالج پارک شاہد زمان سمیت دیگر افسران شامل ہیں ۔