ٹی وی فنکاروں کا فلموں میں مصروف ہونا خوش آئندہے:فائزہ حسن

کراچی(شوبزڈیسک ) ٹی وی اداکارہ فائزہ حسن نے کہا ہے کہ ٹی وی فنکاروں کا فلموں میں مصروف ہونا خوش آئند امر ہے۔ فلم میں کام کرنے کا تجربہ اچھا رہا۔کئی برس سے ٹی وی ڈرامے کررہی ہوں۔ فلم لوڈ ویڈنگ میں کام کرنے کیلئے خصوصی طور پر لندن سے پاکستان آئی تھی۔ڈرامہ برنس روڈ کی نیلوفر سے جو شہرت ملی وہ اب تک دنیا بھر میں میری شناخت بنی ہوئی ہے۔ فلم میں اچھا کردار ہر فنکار کی خواہش ہوتی ہے۔کوئی یادگار کردار کرنے کی خواہشمند ہوں۔ روایتی کرداروں کی آفرز ملتی رہتی ہیں۔ ہدایتکار نبیل قریشی نے مذکورہ فلم میں اہم کردار دیا جس کیلئے ان کی مشکور ہوں۔، میری پرفارمنس کو پسند کیا جارہا ہے۔پاکستانی ڈراموں کے بعد فلموں کا نیا دور شروع ہوچکا ہے جس میں اب ٹی وی فنکاروں نے اپنے جلوے دکھا کر سینما کو ایک نئی تبدیلی کا احساس دلایا ہے۔ ملکی ڈراموں اور فلموں کے ذریعے اب زرمبادلہ بھی ملکی آمدنی کا ایک ذریعہ بن رہا ہے۔ ان خیالات کا اظہار انہوں نے ایک ملاقات میں کیا۔ ان کا کہنا تھا معیاری ڈرامہ پروڈکشنز کے بعد فلموں نے بھی فنکاروں کو نئی راہ دکھائی ہے۔ ذاتی فلمیں بناکر فنکار بھی اپنے دل کی تسکین کرسکتے ہیں۔