راولپنڈی(مانیٹرنگ ڈیسک) پاک فوج کے ترجمان میجر جنرل آصف غفور نے کہا ہے کہ 2019 انشا اللہ پاکستان کی ترقی کا سال ہوگا۔تفصیلات کے مطابق ڈی جی آئی ایس پی آر میجر جنرل آصف غفور نے سماجی رابطوں کی ویب سائٹ ٹویٹر پر افواج پاکستان کی جانب سے نئے سال پر یک جہتی کا پیغام جاری کیا ہے۔ڈی جی آئی ایس پی آر نے کہا پر امن، متحرک اور آگے بڑھتا ہوا پاکستان ہمارا قومی عزم ہے۔میجر جنرل آصف غفور نے ٹویٹ میں لکھا دعا ہے اللہ تعالی پاکستان پر رحمتیں جاری رکھے،آمین۔آئی ایس پی آر کے ڈائریکٹر جنرل نے مزید کہا کہ متحد ہو کر ہی ہم اپنی کام یابیوں کو دوام دے سکتے ہیں۔ڈی جی آئی ایس پی آر نے پر عزم پاکستانیوں اور شہدا کو سلام بھی پیش کیا۔آرمی چیف جنرل قمر جاوید باجوہ سے سعودی عرب کے نائب وزیر دفاع محمد عبداللہ العائش نے ملاقات کی، جس میں باہمی دلچسپی اور خطے کی سلامتی کی صورتحال پر بات چیت کی گئی۔پاک فوج کے شعبہ تعلقات عامہ کے مطابق چیف آف آرمی سٹاف جنرل قمر جاوید باجوہ سے سعودی نائب وزیر دفاع محمد عبداللہ العائش نے جی ایچ کیو راولپنڈی میں ملاقات کی، ملاقات میں باہمی دلچسپی کے امور زیر غورآئے، خطے کی سکیورٹی کی صورتحال پر بھی بات چیت کی گئی۔آئی ایس پی آر کے مطابق ملاقات میں پاکستان اور سعودی عرب کے درمیان دفاعی شعبے میں دو طرفہ تعاون بڑھانے سے متعلق امور پر بات چیت کی گئی۔
