اسلام آباد(صباح نیوز‘اے پی پی) بلوچستان نیشنل پارٹی(مینگل)کے سربراہ اخترمینگل نے وزیراعظم عمران خان سے ملاقات کی اور اپنے تحفظات کر اظہار کیا۔میڈیا رپورٹس کے مطابق حکومتی اتحادی جماعت بلوچستان نیشنل پارٹی(مینگل)کے سربراہ اختر مینگل نے وزیراعظم عمران خان سے ملاقات کی، اور لاپتہ افراد، بلوچستان میں پانی کا مسلہ، افغان مہاجرین کی واپسی کا معاملہ اٹھایا۔ملاقات میں بلوچستان سے متعلق امور پر بھی; تبادلہ خیال کیا گیا جب کہ بلوچستان سے سینیٹ نشست پر ہونے والے اختلافات بھی زیر بحث آئے۔ اس موقع پر اخترمینگل کا کہنا تھا کہ میری سیاست کا مقصد 6نکاتی ایجنڈا ہے، اگر 6نکات پر عملدرآمد نہیں ہوتا تو حکومت میں رہنے کا کوئی جواز نہیں۔ وزیراعظم عمران خان نے لاپتہ افراد کے حوالے سے اقدامات پر اختر مینگل کو اعتماد میں لیا اور ان کے 6نکاتی مطالبات ماننے کی یقین دہانی کراتے ہوئے کہا کہ لاپتہ افراد کی بازیابی تحریک انصاف کے منشور کا حصہ ہے، لاپتہ افراد کی بازیابی کے لیے ادارے مشترکہ طور پر کام کررہے ہیں۔ جب کہ بلوچستان میں پانی کا مسلئہ حل کرنے کا ٹاسک یار محمد رند کو دیا ہے۔وزیراعظم عمران خان سے ان کے معاون خصوصی برائے سمندر پار پاکستانیز سید ذوالفقار عباس بخاری نے منگل کو یہاں ملاقات کی، یہ بات وزیراعظم آفس کی طرف سے جاری بیان میں بتائی گئی، وزیراعظم عمران خان سے قومی کرکٹ ٹیم کے سابق کپتان جاوید میاں داد نے منگل کو یہاں ملاقات کی، یہ بات وزیر اعظم آفس کی طرف سے جاری مختصر بیان میں بتائی گئی، اس موقع پر وزیراعظم کے معاون خصوصی سید ذوالفقار عباس بخاری اور نعیم الحق بھی موجود تھے۔
