روم :(ویب ڈیسک) اٹلی نے13ممالک سے آنے والوں کے ملک میں داخلے پر پابندی لگادی، اس پابندی کا اطلاق ہر اس فرد پر ہوگا جس نے پچھلے 14دنوں میں ان ممالک میں رہائش اختیار کی ہو۔تفصیلات کے مطابق اٹلی کی وزارت صحت نے 13ممالک سے آنے والے تمام افراد کو ملک میں داخل ہونے سے منع کردیا ہے، یہ فیصلہ ان ممالک میں کورونا کے تیزی سے پھیلاؤ کے پیش نظر کیا گیا ہے۔اس حوالے سے اطالوی وزیر صحت رابرٹو اسپرانزا نے کہا ہے کہ پابندی کے شکار ممالک میں آرمینیا ، بحرین ، بنگلہ دیش ، برازیل ، بوسنیا ، چلی ، کویت ، شمالی مقدونیہ ، مالڈووا ، عمان ، پاناما ، پیرو اور ڈومینیکن جمہوریہ شامل ہیں، ان ممالک سے سفر کرنے والے افراد کے لئے اٹلی میں داخلہ بند کردیا گیا ہے۔غیر ملکی خبر رساں ادارے کے مطابق اطالوی وزیرصحت کا کہنا ہے کہ پابندی کا اطلاق گزشتہ14روز میں ان ممالک رہائش پذیر افراد ہوگا، گزشتہ14روز میں ان ممالک کا سفر کرنے والوں پر بھی پابندی کا اطلاق ہوگا، دیگر ممالک سے آنے والوں کو14روز آئسولیشن میں رہنا ہوگا۔اطالوی وزیر صحت رابرٹو اسپرانزا کا مزید کہنا ہے کہ دنیا بھر میں کورونا وائرس کی وبا اب ابھی شدت سے حملہ آور ہے،گزشتہ چند ماہ میں قوم کی جانب سے دی جانے والی قربانیوں کو ضائع نہیں کرسکتے، یاد رہے کہ اٹلی کورونا وائرس سے متاثر ہونے والا پہلا یورپی ملک تھا۔
اٹلی نے 13ممالک سے آنے والوں کو ملک میں داخل ہونے سے منع کردیا
