ویب ڈیسک : عظیم بھارتی اداکار امیتابھ بچن کورونا وائرس کا شکار ہوئے تو سابق پاکستانی فاسٹ باؤلر شعیب اختر ان چند کرکٹرز میں سے تھے جنہوں نے بالی وڈ اداکار کی جلد صحتیاب کے لیے دعا کی۔
بالی وڈ اداکار امیتابھ بچن نے گزشتہ روز سماجی رابطوں کی ویب سائٹ ٹوئٹر پر کورونا وائرس کا شکار ہونے کی تصدیق کی تھی۔
انہوں نے کہا تھا کہ ‘مجھ میں کووڈ کی تشخیص ہوئی ہے اور ہسپتال منتقل ہوگیا ہوں، خاندان اور عملے کے افراد کے بھی ٹیسٹ ہورہے ہیں اور نتائج کا انتظار ہے، گزشتہ 10 دن کے دوران میرے قریب رہنے والوں سے درخواست ہے کہ وہ اپنے ٹیسٹ کروالیں’۔
امیتابھ بچن کورونا کا شکار ہوئے تو چاہنے والوں نے ان کے لیے نیک تمناؤں کا اظہار کرتے ہوئے ان کی جلد صحتیابی کے لیے دعا کی اور ان میں سابق پاکستانی فاسٹ باؤلر بھی شامل تھے۔
شعیب اختر نے اپنے ٹوئٹر پیغام میں کہا تھا کہ امیت جی جلد صحتیاب ہوں، آپ کی جلد صحتیابی کے لیے دعاگو ہوں۔
اس موقع پر ایک ٹوئٹر صارف نے شعیب اختر کو ہتک آمیز لہجے میں جواب دیتے ہوئے کہا کہ سرحد پار دہشت گرد رہتے ہیں، ہمیں کوئی بھی جلد صحتیابی والی دعا کے پیغامات نہیں چاہئیں۔
اس پر شعیب اختر نے طیش میں آئے بغیر بھارتی ٹوئٹر صارف کو جواب دیا کہ سننے والی اوپر والے کی ذات ہے، کیا پتا کس کی سن لے، آپ کے لیبل کرنے سے کوئی لیبل نہیں ہو جاتا۔
شعیب اختر نے اس پیغام سے بھارتی عوام و کرکٹ شائقین کے دل جیت لیے اور انہوں نے راولپنڈی ایکسپریس کے نام سے مشہور سابق فاسٹ باؤلر کے اس عمل کا خیرمقدم کیا۔
یاد رہے کہ شعیب اختر پاکستانی کرکٹرز میں سوشل میڈیا پر سب سے زیادہ متحرک رہتے ہیں اور یہی وجہ ہیں کہ وہ کئی مرتبہ تنازعات کا شکار بھی ہو چکے ہیں۔
واضح رہے کہ امیتابھ بچن کے ساتھ ان کے بیٹے، بہو اور پوتی کے بھی کورونا وائرس کے ٹیسٹ مثبت آ چکے ہیں۔
دوسری جانب قومی ٹیم کے سابق کپتان شاہد آفریدی نے بھی امیتابھ بچن کے لیے نیک خواہشات کا اظہار کرتے ہوئے جلد صحتیابی کی دعا کی ہے۔
