اسلام آباد(ویب ڈیسک)وزیراعظم عمران خان نے کہا ہے کہ گندم کی قیمتوںمیں استحکام کے لیے اقدامات جاری رہیں گے۔ آٹے کی مناسب قیمتوں میں دستیابی بارے لائح عمل مرتب کیا جائے۔
تفصیلات کے مطابق وزیراعظم عمران خان کی زیرصدارت اشیائے ضروریہ کی قیمتوں سے متعلق جائزہ اجلاس منعقد ہوا۔ اجلاس میں اشیاکی مناسب قیمتوں میں دستیابی یقینی بنانے کے حوالے سے تجاویزپرغورکیاگیا۔ عثمان ڈار نے ٹائیگر فورس کے رضاکاروں کی مرتب کردہ رپورٹ پیش کی۔ وزیراعظم نے ٹائیگرفورس کے رضاکاروں کی خدمات کوسراہا ۔ وزیراعظم عمران خان کا کہنا تھاکہ آٹے کی مناسب قیمتوں میں دستیابی بارے لائحہ عمل مرتب کیاجائے۔وزیراعظم نے گندم کی قیمتوں میں استحکام کے لیے طریقہ کارپیش کرنے کی ہدایت کی ۔ ان کا کہنا تھا کہ آٹے کی مدمیں سبسڈی دینے کیلئے طریقہ کاروضع کیاجائے، قیمتوں میں استحکام کے لیے اقدامات جاری رہیں گے۔
وزیراعظم نے وفاقی وزیرنیشنل فوڈسیکیورٹی کی سربراہی میں کمیٹی کے قیام کی ہدایت کی ۔وزیراعظم عمران خان کو وفاقی وزیر حماد اظہر نے بریفنگ دیتے ہوئے بتایا کہ ایک لاکھ ٹن چینی کراچی پہنچ چکی ہے۔ 25ہزار ٹن چینی یوٹیلٹی اسٹورز کارپوریشن نے خریدی اور75ہزار ٹن پنجاب حکومت نے خریدی ہے۔ انہوںنے بریفنگ دیتے ہوئے بتایا کہ پنجاب میں کرشنگ سیزن 10 نومبراور سندھ میں 30نومبر سے شروع ہو گا۔ سیزن شروع ہونے پرچینی کی قیمتوں میں واضح کمی آئے گی۔وزیراعظم کا مزیدکہنا تھا کہ صوبائی حکومتیں منافع خوروں کیخلاف کارروائی کریں،پنجاب حکومت یوٹیلیٹی اسٹورزکوآٹے کی دستیابی یقینی بنائے۔
